Wén jyabaw dalay lamaning wekili bilen sözlishishni xalaydighanliqini bildürdi

Xitay bash ministiri wén jyabaw jüme küni béyjingda muxbirlarni kütüwélish yighini chaqirip, xitayning 1959 - yildin béri hindistanda sürgünde yashawatqan tibet rohaniy dahiysi dalay lamaning wekilliri bilen söhbet ötküzüshni xalaydighanliqini bildürgen.
Muxbirimiz erkin
2009-03-13
Share

Lékin dalay lamaning "bölgünchilik dawasi" din waz kéchishi kéreklikini tekitligen wén jyabaw, xitay hökümitining tibettiki basturush siyasitini aqlap, "tibetning muqim qedem bilen algha qarap tereqqi qiliwatqanliqi siyasitimizning toghriliqini ispatlimaqta," dégen.

Wén jyabaw xitay - tibet söhbiti toghrisida mundaq deydu": bu türlük söhbetlerni dawamlashturushqa bolidu. Bu yerdiki achquchluq mesile dalay lamaning söhbetning netijilik bolushigha yéterlik semimiyet körsitishidur." Wén jyabaw bu sözlerni xitay xelq wekiller qurultiyi memliketlik yighinining yépilish munasiwiti bilen ötküzgen axbarat élan qilish yighinida tekitligen. Merkizi daramsaladiki tibet sergerdan hökümiti bolsa shu küni wén jyabawning söhbetni dawamlashturush heqqidiki sözlirini qarshi alidighanliqini bildürüp, dalay lamaning "her waqit söhbetke teyyar" ikenlikini bildürdi.

Tibet sergerdan hökümitining bash ministiri samdong rénpochi " bu biz qarshi alidighan bisharet. Biz dalay lama hezretlirining wekillirini ewetishke her waqit teyyar," dégen. Dalay lama da'im heqiqi aptonomiye telep qilidighanliqini tekitlep kelgen bolsimu, lékin xitay uni "bölgünchilik gherizi" bar, dep eyiblimekte.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet