Вен җябав хитай хәлқ қурултийиниң мәмликәтлик йиғинидики доклатида уйғур вә тибәтни тилға алди

Хитай баш министири вен җябав хитай хәлқ қурултийиниң җүмә күни бейҗиңда башланған мәмликәтлик йиғинида һөкүмәт хизмитидин доклат берип, өткән йили хитайлар билән йәрлик уйғурлар арисида еғир милли тоқунуш йүз бәргән уйғур или вә тибәт аптоном районида тәрәққиятни алға сүрүдиғанлиқини билдүрди.
Мухбиримиз әркин
2010.03.05

Бу хитай баш министириниң узун йиллардин буян хәлқ қурултийиға бәргән хизмәт доклатида тунҗи қетим уйғур ели вә тибәтни алаһидә тилға елишидур. Лекин анализчилар, райондики йәрлик хәлқниң тәрәққиятиға көңүл бөлүнмисә, 5‏ - июлдикигә охшаш вәқәләрниң қурумайдиғанлиқини агаһландуруп, мәсилиниң түгүни вен җябавниң сөзиниң қандақ әмилиләштүрүлишигә бағлиқ, дәп көрсәтмәктә.

Вен җябав хәлқ қурултийидики доклатида, "биз диққәт нәзиримизни шинҗаң, тибәт вә тибәтләр яшайдиған милли районларниң иқтисади вә иҗтимаий тәрәққиятини алға сүридиған сиясәтләрни түзүш вә иҗра қилишқа қаритимиз" дегән. Лекин у шуниң билән биргә, хитай қораллиқ сақчи қисимлирини бастуруш иқтидарини күчәйтидиғанлиқини тәкитлигән.

Хитай һөкүмити "5 - июл вәқәси"дин кейин уйғур илиға зор көләмлик қораллиқ вә алаһидә сақчи қисимлирини йөткәпла қалмай қораллиқ сақчи қисимлириниң йеңи әтрити вә 5000 кишилик алаһидә сақчи қисими қурушни қарар қилған иди. Уйғур тәшкилатлири хитай даирилириниң бу һәрикитини тәнқидләп, буниң уйғурларға һәйвә қилиш вә қорқутушни мәқсәт қилидиғанлиқини илгири сүргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.