5 ‏- Iyul namayishchilirini basturushta ölgen xitay komandir, xitayni tesirlendürgen 10 chong shexs namzati bolghan

Xitayda 7 yildin béri élip bériliwatqan xitayni tesirlendürgen 10 chong shexs namliq bahalashta, 5 ‏- iyul weqeside Uyghurlar teripidin urup öltürülgen xitay komandir wen jinggang namzatliqqa kirgen.
Muxbirimiz shohret hoshur
2010.01.05

Bahalash komitétining bügün ashkarilishiche, xitay boyiche jem'iy 30 kishi namzatliqqa körsitilgen. Buning ichide 3 kishi Uyghur rayonidin körsitilgen.

Uyghur rayonidin körsitilgenler arisida, 5 - iyul weqeside namayishni basturush wezipisini ötigen xitay qoralliq qisim komandirliridin wen jinggang orun alghan. Wen jinggang shu kuni namayishni basturush wezipisini ijra qiliwatqan chaghda, namelum kishiler teripidin urup öltürüwétilgen.

Wen jinggangning ölümi xitay da'iriliri we eskerlirini qattiq qayghugha salghan bolup, uning jesiti daghdughiliq depne murasimi bilen uzitilghan we uninggha inqilawiy qurban dep nam bérilgen idi.

Xitay metbu'ati bashtin tartip, wen jinggangning 5 - iyulda öltürülgenlikini ashkarilighan bolsimu, uning qaysi meydanda, qandaq shekilde öltürülgenliki heqqide melumat bergini yoq. Muhajirettiki Uyghurlar xitay saqchilirining wen jinggangning öltürülüsh jeryani heqqide tepsiliy melumatqa ige bolalmighanliqini yaki xitay qoralliq qisimlirining heywisini saqlash üchün, weqening tepsiliy jeryani yoshuruluwatqanliqini perez qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.