Хитай президент обаманиң далай лама билән көрүшкәнликигә етираз билдүрди

Хитай һөкүмити җүмә күни америкиниң бейҗиңдики баш әлчисини чақиртип, америка президенти барак обаманиң түнүгүн тибәт роһани даһиси далай ламани ақсарайда күтүвалғанлиқиға наразилиқ билдүргән. Обаманиң һәрикитини хитайниң ички ишлириға "қопаллиқ билән арилашқанлиқ" болупла қалмай, бу йәнә җуңго - америка мунасивитигә "бузғунчилиқ қилғанлиқтур" дәп әйиблигән.
Мухбиримиз әркин
2010-02-19
Share

Хитай ташқи ишлар министирлиқи баянатчиси ма җавшүйниң ашкарилишичә, хитайниң муавин ташқи ишлар министири суй тйәнкәй америкиниң бейҗиңдики баш әлчиси җон хунтсмәнни чақиртип," америкиниң һәрикити җуңгониң ички ишлириға қопаллиқ билән арилашқанлиқтур, бу җуңго хәлқиниң миллий һессиятиға азар бәрди шундақла җуңго - америка мунасивитигә еғир бузғунчилиқ салди" дегән.

Президент обама түнүгүн далай ламани ақсарайда күтүвелип, далай ламаниң "оттура йоли", тибәт хәлқиниң өзигә хас диний, тили вә мәдәнийәт кимлики вә кишилик һоқуқини қоғдашни қоллайдиғанлиқини билдүргән. Далай лама болса обаманиң тибәт хәлқиғә көңүл бөлгәнликигә рәһмәт ейтқан иди. Лекин хитай ташқи ишлар министирлиқиниң баянатчиси ма җавшүй болса, "тибәт җуңгониң талаш - тартиш қилишқа болмайдиған айрилмас бир қисими, тибәткә мунасивәтлик мәсилиләр җуңгониң ички ишидур" дәп тәкитлигән.

Далай лама түнүгүн президент обама билән учришипла қалмай, америка дөләт ишлар министири һеларий клинтон биләнму учрашқан иди. Хәлқара тибәт һәрикити тәшкилати елан қилған түнүгүнки паалийәт тоғрисидики баянатида, бу учришишлар "тибәт мәсилисиниң йәр шари характерлик әһмийәткә игә мәсилә икәнликини намайән қилиду" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт