Xitay prézidént obamaning dalay lama bilen körüshkenlikige étiraz bildürdi

Xitay hökümiti jüme küni amérikining béyjingdiki bash elchisini chaqirtip, amérika prézidénti barak obamaning tünügün tibet rohani dahisi dalay lamani aqsarayda kütüwalghanliqigha naraziliq bildürgen. Obamaning herikitini xitayning ichki ishlirigha "qopalliq bilen arilashqanliq" bolupla qalmay, bu yene junggo - amérika munasiwitige "buzghunchiliq qilghanliqtur" dep eyibligen.
Muxbirimiz erkin
2010-02-19
Share

Xitay tashqi ishlar ministirliqi bayanatchisi ma jawshüyning ashkarilishiche, xitayning mu'awin tashqi ishlar ministiri suy tyenkey amérikining béyjingdiki bash elchisi jon xuntsmenni chaqirtip," amérikining herikiti junggoning ichki ishlirigha qopalliq bilen arilashqanliqtur, bu junggo xelqining milliy héssiyatigha azar berdi shundaqla junggo - amérika munasiwitige éghir buzghunchiliq saldi" dégen.

Prézidént obama tünügün dalay lamani aqsarayda kütüwélip, dalay lamaning "ottura yoli", tibet xelqining özige xas diniy, tili we medeniyet kimliki we kishilik hoquqini qoghdashni qollaydighanliqini bildürgen. Dalay lama bolsa obamaning tibet xelqighe köngül bölgenlikige rehmet éytqan idi. Lékin xitay tashqi ishlar ministirliqining bayanatchisi ma jawshüy bolsa, "tibet junggoning talash - tartish qilishqa bolmaydighan ayrilmas bir qisimi, tibetke munasiwetlik mesililer junggoning ichki ishidur" dep tekitligen.

Dalay lama tünügün prézidént obama bilen uchrishipla qalmay, amérika dölet ishlar ministiri hélariy klinton bilenmu uchrashqan idi. Xelq'ara tibet herikiti teshkilati élan qilghan tünügünki pa'aliyet toghrisidiki bayanatida, bu uchrishishlar "tibet mesilisining yer shari xaraktérlik ehmiyetke ige mesile ikenlikini namayen qilidu" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet