Нәнҗиңда оқуғучилар билән сақчилар арисида тоқунуш йүз бәргән

Кишилик һоқуқ тәшкилатлириниң хәвәр қилишичә, хитайниң нәнҗиң шәһиридә миңлиған оқуғучилар билән шу йәрлик сақчилар оттурисида тоқунуш йүз берип, 30 оқуғучи яриланған.
Мухбиримиз әркин
2009-05-20
Share

Хоңкоңдики хитай демократийә вә кишилик һоқуқ учур мәркизиниң бу һәқтики бир хәвиридә , вәқәниң хитай сақчилири нәнҗиң авиатсийә вә аләм қатниши университети оқуғучилирини урғанлиқи сәвәбидин келип чиққанлиқини,  дүшәнбә күни миңлиған оқуғучиларниң кочида намайиш қилип, қатнашни тосувалғанлиқини, сақчилар билән оқуғучилар арисидики тоқунушта 30 оқуғучиниң яриланғанлиқини билдүргән.

Хитай демократийә вә кишилик һоқуқ учур мәркизиниң баянатида мундақ дегән": алий мәктәп оқуғучилири билән  сақчилар арисида тоқунуш йүз берип, 30 оқуғучи яриланди, бир сақчи аптомобили чеқиветилди".  Хәвәрләрдә әскәртишичә, намайиш сәйшәнбә күни әтигәнгә қәдәр давамлашқан болуп, оқуғучилардин 5 киши қолға елинған. 

Бу вәқә тйәнәнмен оқуғучилар демократийә һәрикити бастурулғанлиқиниң 20 йиллиқ хатирә күни мәзгилидә йүз бәргән болуп, бу хитай коммунистик һакимийити мәмликәт ичи вә сиртида тйәнәнмен вәқәсини ақлаш һәққидики еғир бесимға дуч келиватқан мәзгилләр иди.

Чәтәл ахбарат агентлиқлириниң хәвәр қилишичә, нәнҗиң авиатсийә вә аләм қатниши университети җайлашқан җяңниң районлуқ һөкүмәт даирилири болса , вәқәниң уқушмаслиқтин келип чиққанлиқини илгири сүрүп, вәқәдә тоқунуш йүз бәргәнликини, адәм яриланғанлиқини рәт қилған. Җяңниң районлуқ һөкүмәт даирилириниң баянатида "бәзи оқуғучилар  оқушмай һөкүмәт хадимлири икки оқуғучини яллап елип маңди, дәп ойлап қелип топлинивалған"лиқини  тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт