Uyghur élide saqchilarning kimlik tekshürüsh da'irisining kéngeygenliki uqturuldi

Tengritagh torining 14-noyabirdiki xewiridin melum bolushiche, bu belgilime xitayning 11-nöwetlik xelq qurultiyining 23-yighinida qarardin ötken bolup, 11-ayning 15-künidin bashlap pütün xitay miqyasida omumlashturulidiken.

Xewerlerdin melum bolushiche, Uyghur aptonom rayon da'iriliri saqchilarning puqralarning kimlikini tekshürüsh da'irisini kéngeytishni Uyghur élide eng qisqa mezgilde omumlashturushni qarar qilghan. Chet'ellerdiki siyasiy analizchilarning bildürüshiche, Uyghur aptonom rayonida xitay hökümiti rayondiki muqimliqni saqlashni bahane qilip, Uyghurlargha qaritilghan basturushni kücheytiwatqan ehwalda, saqchilarning kimlik tekshürüsh da'irisining kéngeytilishi, téximu köpligen Uyghurlarning tutqun qilinishigha seweb bolushi mumkin iken.

Xitayning 11-nöwetlik xelq qurultiyida yene, bundin kéyin ahalilerning kimlikini béjirishte barmaq izini élish qararlashturulghan bolup, xitay jama'et xewpsizlik ministirliqi amanliq saqlash idarisining bashliqi xu'ang shungchüen puqralarning barmaq izini élishni peydin-pey emelge ashuridighanliqini bildürgen.