Amérika karxanichilar birliki xitay polat matériyallirini amérikida ishlitishke qarshi turdi

Amérika karxanichilar birliki a'am amérikidiki zor kölemlik qurulushlarda xitayning qurulush matériyallirini ishlitishni toxtitish üchün heriketke ötti.
Muxbirimiz irade
2012.03.27

Düshenbe küni birlik ezaliri san-fransisko shehiridiki xitaydin kirgüzülgen 7 milyard dollar qimmitidiki polat matériyali bilen yasiliwatqan san fransisko-okland köwrüki yénida namayish qilip, qurulush matériyalining orunsiz halda xitaydin kirgüzülgenlikini eyiblidi. Köwrükning ikki uchida oxshash waqitta élip bérilghan namayishchilar “Pütünley xitaydin import qilin'ghan polattin yasalghan bu köwrük eslide amérikida ishlepchiqirilghan matériyallar bilen yasilishi kérek idi” dégen xetler yézilghan sho'ar taxtilirini kötürüp chiqti.

Amérika karxanichilar birlikining mu'awin bashliqi skot pa'ul fransiye agéntliqining muxbirigha amérikining zor qurulushlarda aldi bilen öz ichidiki karxanilarni oylishishi kéreklikini bildürdi. U mundaq dédi: “Amérikining dölet we shtat qanunliri zor kölemlik qurulushlarda aldi bilen choqum amérikining öz ichidiki karxanilargha purset bérishni kapaletke ige qilish kérek, xitay dunya soda teshkilatining bezi alaqidar maddilirigha qol qoymighan, shunga amérika xitay qurulush matériyallirini ret qilishqa tamamen hoquqluq”, emma u yene eskertip, bu heriketning bashqa döletlerge qaritilmighanliqini, amérika bazirining alaqidar maddilargha qol qoyghan herqandaq döletke ochuqluqini bildürdi.

Igilinishiche, mezkur birlik bundin kéyin her hepte amérikidiki zor qurulushlarda orunsiz halda xitay polat matériyallirini ishletken jaylarda namayish qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.