Хитай йәнә үч нәпәр тибәтликкә еғир җаза көрди

Б б с ниң сәйшәнбә күни тибәт күндилик гезити хәвиридин нәқил елип елан қилишичә, тибәт соти сәйшәнбә күни йәнә үч нәпәр тибәтликни, өткән йили 14 - март ласа топилиңиға қатнашқан, дәп еғир җаза көргән болуп, җаза көрүлгән бу үч нәпәр тибәтликниң һәммиси яш қизлар икән.
Мухбиримиз гүлчеһрә
2009-04-21
Share

Хитай даирилири буларниң 20 яшлиқ биригә өлүм җазаси, 21 яшлиқ биригә өмүрлүк қамақ җазаси, 23 яшлиқ йәнә биригә 10 йиллиқ қамақ җазаси һөкүм қилған.

Хәвәрдин мәлум болушичә, бу үч нәпәр яш тибәт қиз бултур ласада йүз бәргән тибәтләрниң һөкүмәткә қарши наразилиқ һәрикити җәрянида икки қетимлиқ от қоюшқа қатнашқанлар болуп, улар тәрипидин от қоюлған хитайларниң икки кийим - кечәк дукинида, алтә хитай өлгән.

Ласа шәһәрлик оттура соти буниң алдида йәни мушу айниң бешида, бултурқи ласа топилиңида от қоюш вәқәсигә мунасивәтлик, дәп бәш кишигә еғир җаза бәргән иди.

Уларниң иккисигә өлүм җазаси, йәнә иккисигә өлүм җазасини икки йил кечиктүрүп иҗра қилиш, биригә өмүрлүк қамақ җазаси елан қилған.

Хитай даирилири бултурқи 14 - март ласа вәқәсидә 21 кишиниң өлгәнликини елан қилған болсиму, әмма тибәт сүргүн һөкүмити вәқәдин кейинки хитайниң баструрушлирида 200 дин артуқ тибәтниң өлтүрүлгәнликини илгири сүрмәктә.

Шинхуа агентлиқи бу йил иккинчи айда хитай даирилириниң һазирға қәдәр ласа вәқәсигә четишлиқ дәп 76 киши үстидин еғир қануний җаза һөкүм қилғанлиқини елан қилған иди.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт