Xitay, tibetler qarshiliq herikitining qaytilinishining aldini almaqta

6 - Mart küni béyjingda échiliwatqan xitay 11 - nöwetlik xelq wekilliri qurultiyi we 12 - nöwetlik siyasiy kéngesh yighinigha qatnishiwatqan tibet aptonum rayon wekilliri muxbirlarni kütüwélish yighini ötküzdi.
Muxbirimiz gülchéhre
2009-03-06
Share

Xitay hökümitining tibet aptonum rayonigha qoyghan yuqiri derijilik emeldarliri chet'el muxbirlirigha " tibet alahide zor muqimliq saqlash qisimlirigha muhtaj" dep bildürgen. Bu heqte amérika awazi radi'osining xewiride tibet aptonum rayoni re'isining sözini neqil élishiche, xitay da'iriliri jiddiy wasitilerni qollinip, tibetning nöwettiki weziyitini kontrol qilghan bolup, bu kéler hepte tibetlerning xitay kommunistlirigha qarshi élip barghan inqilabining 50 yilliq xatiriside,zor weqelerning tughulishining aldini élishni meqset qilghan iken.

Bultur 14 - martta tibette zor xelq naraziliq herikiti élip barghan idi gerche u qétimliq naraziliq tinchliq yoli bilen élip bérilghan bolsimu xitayning qattiq basturushigha uchrighan. Béyjingdiki yighin'gha qatnishiwatqan tibet wekilliri chet'el muxbirlirining weqede qanchilik tibetning öltürülgenliki hemde jazalan'ghanliqi heqqide sorighan so'aligha toluq jawab bermey peqet weqege munasiwetlik 953 ademning qolgha élin'ghanliqi 76 sige qanun boyiche jaza körgenlikini bildürgen.

Emma sürgündiki tibet hökümiti uchur merkizining bildürüshiche, bulturqi 13 - we 14 - mart tibet naraziliq herikitide 218 tibet xitay saqchiliri teripidin öltürülgen, tutqun qilin'ghanlar 7 mingdin ashqan.

Xitayning tibet aptonum rayonigha qoyghan re'isi muxbirlargha bulturqi weqeni zorawanliq heriket dep körsitip, "biz jiddiy tedbirlerni qollinip bu xildiki zor weqelerning qayta yüz bérishning aldini alimiz" dep tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet