خىتاي كومپارتىيىسى سىياسىي بيۇروسىنىڭ 9 كىشىلىك دائىمىي ئەزالار يىغىنى 'شىنجاڭ' مەسىلىسىنى مۇزاكىرە قىلدى

خىتاي كومپارتىيىسى سىياسىي بيۇروسىنىڭ 9 كىشىلىك دائىمىي كومىتېتى جۈمە كۈنى "شىنجاڭ" مەسىلىسى ھەققىدە يىغىن چاقىرىپ، ئۇيغۇر ئېلىنىڭ ئىقتىسادى ۋە ئۇزۇن مۇددەتلىك ئىجتىمائىي مۇقىملىقىنى ساقلاش پىلانى ئۈستىدە مۇزاكىرە ئېلىپ بارغان.
ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ
2010.04.23
Share on WhatsApp
Share on WhatsApp

شىنخۇا ئاخبارات ئاگېنتلىقىنىڭ بۇ ھەقتىكى خەۋىرىدە، خىتاي سىياسىي بيۇرو دائىمىي ئەزالىرىنىڭ ئۇيغۇر ئېلى "ئىقتىسادى - ئىجتىمائىي تەرەققىياتىنى ساغلام ھەم تېز سۈرەت بىلەن ئالغا سۈرۈش، خەلق تۇرمۇشىنى ياخشىلاش ۋە ئۇنىڭغا كاپالەتلىك قىلىشنى ئالدىنقى ئورۇنغا قويۇپ، رايوندىكى بارلىق مىللەتلەرنىڭ تېخىمۇ گۈللەپ ياشنىشىنى ھەم شاد - خۇرام تۇرمۇش كەچۈرۈشىنى ئىلگىرى سۈرۈش" دېگەن مەزمۇندا قارار چىقارغانلىقىنى بىلدۈرگەن.

بۇ قېتىمقى يىغىن خىتاي كومپارتىيىسى ۋە مەركىزى ھۆكۈمىتىنىڭ كېلەر ئاي چاقىرىلىشى پىلانلانغان "شىنجاڭ" سۆھبەت يىغىنى ئېچىلىشنىڭ ئالدىدا چاقىرىلىپلا قالماي، 2009‏ - يىلى يۈز بەرگەن "5 ‏- ئىيۇل ۋەقەسى"نىڭ بىر يىللىق خاتىرە كۈنىگە ئاز قالغان مەزگىلدە چاقىرىلغان ئىدى. "5 ‏- ئىيۇل ۋەقەسى" خىتاينىڭ 60 يىلدىن بۇيان "شىنجاڭ"دا يولغا قويۇپ كېلىۋاتقان مىللىي سىياسىتىگە ئېغىر زەربە بەرگەن بولۇپ، بۇ ۋەقەدىن كېيىن خىتاي دائىرىلىرىنى "مىللىي سىياسىتى"نى ئۆزگەرتىشكە چاقىرىدىغان ئاۋازلار كۈچەيگەن.

جۈمە كۈنكى يىغىندا خىتاي رەھبەرلىرىنىڭ ئۇيغۇر ئېلىدە ئىجتىمائىي مۇقىملىقنى ساقلاش، ئىجتىمائىي - ئىقتىسادى تەرەققىياتنى ئىلگىرى سۈرۈشكە دائىر قانداق كونكرېت قارارلارنى ئالغانلىقى مەلۇم ئەمەس.

دۇنيا ئۇيغۇر قۇرۇلتىيى باياناتچىسى دىلشات رىشىت، خىتاي ھۆكۈمىتى مەيلى قانداق قارار چىقارمىسۇن، ئۇيغۇر خەلقى ئىجتىمائىي ۋە ئىقتىسادى تەرەققىياتنىڭ سىرتىدا قالدۇرۇلۇپ، ئۇلارنىڭ ئىگىلىك ۋە كىشىلىك ھوقۇقى ئۈزلۈكسىز دەپسەندە قىلىنىشتەك ھازىرقى ۋەزىيەتكە خاتىمە بېرىلمىسە، مەسىلە داۋاملىق ئېغىرلىشىدىغانلىقىنى ئاگاھلاندۇردى.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.