Хитай японийигә тәһдит селип, кемә башлиқини қоюп бәрмисә мунасивәткә тәсир йетидиғанлиқини агаһландурди

Хитай даирилири җүмә күни японийиниң хитайда турушлуқ баш әлчисини йәнә бир қетим чақиртип, японийә тәрипидин тутувелинған хитай белиқчилар кемисиниң башлиқини дәрһал қоюп беришни, әгәр дәрһал қоюп берилмисә, буниң хитай - японийә мунасивитини зәхмәткә учритидиғанлиқини агаһландурған.
Мухбиримиз әркин
2010-09-10
Share

Хитай ташқи ишлар министири яң җйечи җүмә күни японийиниң хитайда турушлуқ баш әлчиси уйчирио нивани һозуриға чақиртип, юқириқи тәләпни қойған. Бу хитай тәрәпниң японийә баш әлчисини 3 - қетим һозуриға чақиртишидур.

Лекин, яң җйечи японийә баш әлчисини һозуриға чақиртип бир қанчә саәт өткәндин кейин, японийиниң бир йәрлик сот мәһкимиси японийә тәптиш хадимлириниң хитай белиқчилар кемә башлиқини 19 - сентәбиргичә тутуп туруш һоқуқи барлиқини елан қилди. Хитай тәрәп буниңдин бурун өз ‏ - ара қаршилишишниң икки тәрәплимилик мунасивәткә зәхмәт йәткүзүдиғанлиқини илгири сүргән.

Бу вәқә сәйшәнбә күни японийиниң куба арилида йүз бәргән болуп, мәзкур арал японлар сәнкаку, дәп атайдиған, лекин хитайлар дявюдав, дәп исим қоювалған игилик һоқуқи талаш - тартиштики аралниң бир аз шималиға тоғра келәтти.

Хитай ташқи ишлар министирлиқиниң баянатида әскәртилишичә, яң җейчи японийә баш әлчисидин хитай белиқчилар кемисиниң башлиқи җән чишюң вә униң белиқчилар әтритини дәрһал қоюп беришни тәләп қилған. японийә ташқи ишлар министири катсуя җүмә күни токйода мәзкур вәқәгә инкас қайтуруп, яң җйечиниң япон баш әлчисини һозуриға чақиртқанлиқини " әпсуслинарлиқ иш" дегән.

Хитай ташқи ишлар министирлиқи баянатчиси җяң йүй пәйшәнбә күни елан қилған баянатида японийиниң бу вәқәни ички қанунлири бойичә бир тәрәп қилиши "күлкилик, қанунсиз вә инавәтсиз" дәп җакарлиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт