Xitay yaponiyige tehdit sélip, kéme bashliqini qoyup bermise munasiwetke tesir yétidighanliqini agahlandurdi

Xitay da'iriliri jüme küni yaponiyining xitayda turushluq bash elchisini yene bir qétim chaqirtip, yaponiye teripidin tutuwélin'ghan xitay béliqchilar kémisining bashliqini derhal qoyup bérishni, eger derhal qoyup bérilmise, buning xitay - yaponiye munasiwitini zexmetke uchritidighanliqini agahlandurghan.
Muxbirimiz erkin
2010-09-10
Share

Xitay tashqi ishlar ministiri yang jyéchi jüme küni yaponiyining xitayda turushluq bash elchisi uychiri'o niwani hozurigha chaqirtip, yuqiriqi telepni qoyghan. Bu xitay terepning yaponiye bash elchisini 3 - qétim hozurigha chaqirtishidur.

Lékin, yang jyéchi yaponiye bash elchisini hozurigha chaqirtip bir qanche sa'et ötkendin kéyin, yaponiyining bir yerlik sot mehkimisi yaponiye teptish xadimlirining xitay béliqchilar kéme bashliqini 19 - séntebirgiche tutup turush hoquqi barliqini élan qildi. Xitay terep buningdin burun öz ‏ - ara qarshilishishning ikki tereplimilik munasiwetke zexmet yetküzüdighanliqini ilgiri sürgen.

Bu weqe seyshenbe küni yaponiyining kuba arilida yüz bergen bolup, mezkur aral yaponlar senkaku, dep ataydighan, lékin xitaylar dyawyudaw, dep isim qoyuwalghan igilik hoquqi talash - tartishtiki aralning bir az shimaligha toghra kéletti.

Xitay tashqi ishlar ministirliqining bayanatida eskertilishiche, yang jéychi yaponiye bash elchisidin xitay béliqchilar kémisining bashliqi jen chishyung we uning béliqchilar etritini derhal qoyup bérishni telep qilghan. Yaponiye tashqi ishlar ministiri katsuya jüme küni tokyoda mezkur weqege inkas qayturup, yang jyéchining yapon bash elchisini hozurigha chaqirtqanliqini " epsuslinarliq ish" dégen.

Xitay tashqi ishlar ministirliqi bayanatchisi jyang yüy peyshenbe küni élan qilghan bayanatida yaponiyining bu weqeni ichki qanunliri boyiche bir terep qilishi "külkilik, qanunsiz we inawetsiz" dep jakarlighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet