Хитай 'зәһәрлик йиңнә' һуҗумини уйғурларға артти

Хитай җамаәт хәвпсизлик министири мең җйәнҗу җөмә күни үрүмчидә баянат елан қилип, салаһийити намәлум кишиләрниң үрүмчи шәһәр аһалисигә " зәһәрлик йиңнә" билән һуҗум қилиш вәқәсиниң җавабкарлиқини уйғурларға артти.
Мухбиримиз әркин
2009.09.04

"Зәһәрлик йиңнә" вәқәси пәйшәнбә вә җүмә күнлири миңлиған хитай көчмәнлириниң намайиш қилип, уйғурларға һуҗум қилишини, 5 адәмниң өлүшини, 14 адәмниң ярилинишини кәлтүрүп чиқарған иди.

Бирләшмә агентлиқиниң хәвәр қилишичә, мең җйәнҗу "зәһәрлик йиңнә" билән һуҗум қилиш вәқәси охшашла 5 ‏- июлдики топилаңни қозғиған "миллии бөлгүнчиләр" ниң қилмиши, дегән болуп, у " зәһәрлик йиңнә билән һуҗум қилиш вәқәси 5 ‏- июл вәқәсиниң давами. Бу вәқә қанунсиз елементлар вә милли бөлгүнчи күчләрниң күшкүртүши астида елип берилған". "Уларниң мәқсити милләтләр иттипақлиқини бузуш" дегән. Лекин мең җйәнҗу бу қаришини испатлайдиған һечқандақ пакит оттуриға қоймиған.

"Зәһәрлик йиңнә" вәқәси икки күндин бери үрүмчидә хитай көчмәнлириниң намайиш қилип, аптоном район даирилириниң бихәтәрликни сақлалмиғанлиқи сәвәбидин, ваң лечүәнниң вәзиписидин истипа беришини тәләп қилишиға сәвәб болған иди.

Хитай мәтбуатлири тунҗи қетим чаршәнбә күни "зәһәрлик йиңнә гуруһи" һәққидә хәвәр берип, 5 ‏- июл вәқәси йүз бәргән икки айдин бери 476 адәмниң "зәһәрлик йиңнә "һуҗумиға учриғанлиқини илгири сүргән. Лекин немә үчүн бу вәқәни узундин бери хәвәр қилмай әмди елан қилғанлиқини чүшәндүрмигән.

Хитай мәтбуатлири "зәһәрлик йиңнә" вәқәсини хәвәр қилиштин сәл бурун үрүмчидики бир башланғуч мәктәпниң уйғур оқуғучилириға зәһәрлик ваксина селиш вәқәси йүз берип, нурғун оқуғучиниң зәһәрлиниш, бир қисим оқуғучиларниң өлүш вәқәси йүз бәргән иди.

Үрүмчидики сәһийә тармақлири оқуғучиларниң дохтурханида қутқузулуватқанлиқини етирап қилған. Лекин даириләр бу вәқә үстидә еғиз ачмиған иди. Әмди болса мең җйәнҗу "зәһәрлик йиңнә гуруһи"ни "милли бөлгүнчи күчләр" дәп елан қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.