Amérika dölet mejlisi ezaliri obamadin xitaydiki adem bédikchiliki sodisigha köngül bölüshni telep qildi

Amérika dölet mejlisi ezaliri obama hökümitini xitaydiki qiz - ayallarni élip sétishni asas qilghan adem bédikchiliki sodisigha köngül bölüshke chaqirip, xitay we hindistan qatarliq döletlerge adem bédikchilikini kontrol qilish heqqide bésim ishlitishni telep qildi.
Muxbirimiz erkin
2010-10-01
Share

Amérika jumhuriyetchi awam palata ezasi kirstofér sémit peyshenbe küni dölet mejlisi tashqi ishlar komitéti teripidin chaqirilghan guwahliq bérish yighinida söz qilip, amérika dölet ishlar ministirliqining xitay we hindistandiki adem bédikchiliki sodisini bashqidin omumi yüzlük bahalap chiqishni otturigha qoydi.

Kirstofér sémitning eskertishiche, xitay hökümiti shimali koriyidin xitaygha qéchip kelgen koriyilik musapirlarni élip - sétish mesilisini körmeske sélip, buninggha héchqandaq tedbir qollanmighan. U, xitayning "bir perzentlik" nopus tüzümi qiz - oghullar nisbitining buzulushini keltürüp chiqirip, qiz - ayallarni élip sétish bédikchilikining janlinishigha yol achqanliqini bildürdi.

Xitay nopus mutexessislirining agahlandurushiche, 2020 ‏- yilgha barghanda xitayda 40 milyon toy yéshidiki oghullar toy qilidighan xotun tapalmaydighan weziyet shekillinidiken. Bezi analizchilar bu mesile kelgüside xitay jem'iyitidiki éghir ijtima'iy mesilige aylinip, jem'iyet muqimliqigha jiddiy tehdit peyda qilidighanliqini ilgiri sürmekte.

Xitay hökümiti 1980 - yildin bashlap xitay puqralirigha, 1987‏ - yildin bashlap Uyghurlargha pilanliq tughut siyasitini yürgüzgen idi. Da'iriler pilanliq tughut siyasitining Uyghur nopusining qurulmisigha körsetken tesiri heqqide hazirgha qeder héchqandaq resmiy doklat élip qilip baqmighan bolsimu, lékin bu siyaset xitay jem'iyitide qiz -oghullar tengpungluqining buzulushi, nopusning qérishini tézlitishtek bezi ijtima'iy aqiwetlerni keltürüp chiqarghanliqi heqqide bezi doklatlarni élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet