Xitayda bu yil kirgendin béri 260 bala éghiz - burun yallughida öldi

Xitay hökümiti jüme küni xitayda bu yil kirgendin buyan 260 balining éghiz - burun yallughida ölgenlikini, bu wirus bilen aghrighan balilarning sanining nechche yüz minggha yétidighanliqini élan qildi.
Muxbirimiz erkin
2010.05.07

Xewerlerde eskertishiche, éghiz - burun yallughi xitayda her yili etiyaz we yaz peslide bash kötüridighan késellik bolsimu, lékin mezkur késellik ötken yilgha qarighanda, bu yil baldur bashlan'ghan.

"Béyjing xewerler" gézitining xewiride, xitay sehiye ministirliqi yuqumluq késelliklerni kontrol qilish we aldini élish idarisining mu'awin mudiri shyaw dungluning sözini neqil keltürüp, bu yil kirgendin buyanqi 5 ayda mezkur késellik sewebidin ölgen balilarning sani ötken yilning oxshash mezgilidin 143% éship ketkenlikini bildürgen.

Bu heqtiki xewerlerde, mezkur késellikning gu'angdung we gu'angshilarda keng tarqalghanliqini ilgiri sürmekte. Lékin Uyghur aptonom rayonidiki axbarat wastilirida bolsa, mezkur késellikning rayonda bu yilqi tarqilish ehwaligha da'ir xewerlerni uchratqili bolmidi.

Shyaw dunglu bu késellik normalda 5 ‏- we 7 - aylarda keng tarqilidighan késellik bolsimu, lékin bu yil 4‏ - aydila yuqiri pellige chiqqanliqini eskertip, 430 ming balining mezkur késellik wirusida aghrighanliqini bildürgen.

Xitay sehiye ministirliqining ashkarilishiche, 2009‏ - yili xitayda mezkur késellik sewebidin 353 bala ölgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.