Лйәнтаң кәнтидики аһалиләрниң намайиши шәһәрлик һөкүмәт алдиғичә илгирилиди

Даириләр бәргән вәдилиригә әмәл қилмиғандин кейин, наразилиқ намайиши техиму улғийип, намайишчилар бүгүн йәни дүшәнбә күни чүштин бурун шәнту шәһәрлик һөкүмәтниң алдиға топланған.

10Миңдин артуқ киши шәһәрлик һөкүмәт алдида тизлинип олтуруп, һөкүмәткә наразилиқини ипадилигән. Әслидә лйәнтаң кәнтидики аһалиләр, кәнттә сетиветилгән йәрләрни сүрүштә қилип, даириләргә илтимас сунған. Даириләр сетиветилгән йәрләр һәққидә һесаб берәлмигәндин кейин, кәнт аһалилири топлишип наразилиқ һәрикити башлиған. Радиомиз хитайчә бөлүминиң хәвәр қилишичә, бүгүн шәһәрлик һөкүмәт алдиға топланған намайишчилар, “йәрлиримизни қайтуруп бәр”, “пуқралиқ һоқуқимизни қайтуруп бәр” дегән шоарлар йезилған лозункиларни көтүргән вә намайиш мәйданида мушу хил шоарларни товлиған.

Мәлум болушичә, намайиш давамида шәһәрлик һөкүмәтниң бир катипи оттуриға чиқип сөз қилип, оттуриға қоюлған мәсилигә 3 ай ичидә җаваб беридиғанлиқини ейтқан. Әмма намайишчилар катипниң бу сөзлиригә қайил болмиған вә шәһәрлик һөкүмәт секретариниң җаваб беришини тәләп қилған. Мәлум болушичә намайиш бүгүн саәт иккигә қәдәр давам қилған.