Хитайда сиясий ислаһат елип беришни тәшәббус қилған зиялий қолға елинди

Хитайда сиясий ислаһат елип беришни тәшәббус қилған зиялий лю шавбо бүгүн қолға елинди. Бирләшмә агентлиқиниң баян қилишичә, хитайда елан қилинған 'икки миң сәккизинчи йил хартийиси' ни язған мустәқил язғучи лю шавбо хитайда кишилик һоқуқни қоғдашни, әмәлдарларни очуқ - ашкара сайлашни, хәлқниң пикир қилиш, динға етиқад қилиш әркинликини йолға қоюшни, коммунист партийиниң һәрбий қисимларға, һөкүмәткә, сот мәһкимилиригә болған контроллуқиға хатимә беришни тәшәббус қилған иди. У, шу сәвәбтин бултур 12 ‏ - айниң 8 ‏ - күни нәзәрбәнткә елинған иди.
Мухбиримиз вәли
2009-06-24
Share

Әмди 7 ай өткәндә, бейҗиң шәһәрлик җамаәт хәвпсизлик идариси лю шавбониң хотуниға ' сотсиалистик дөләтни ағдуруш җинайити өткүзгән лю шавбо 2009‏ - йил 6‏ - айниң 23‏ - күни саәт 11 дә қолға елинди' дәп уқтурған. Униңға җинайи ишлар қануниниң 105 ‏ - маддиси буйичә әң көп болғанда 15 йиллиқ қамақ җазаси һөкүм қилиниши мумкин икән.

Америка авазиниң баян қилишичә, хитайдики мустәқил қәләмкәшләр җәмийитиниң муавин башлиқи җаң чишең хитай һөкүмитиниң мустәқил язғучи лю шавбони қолға алғанлиқиға қаттиқ наразилиқ билдүрди вә 'коммунист партийиниң җинайи ишлар қанунидики 105‏ - мадда мәхсус дөләт пуқралириниң пикир баян қилиш әркинликини бастуруш үчүн зиянкәшлик қилидиған вәһши қанун' дәп көрсәтти.



Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт