Rabiye qadir xanim xoten weqeside qolgha élin'ghanlarning teqdiridin endishe qilmaqta

Uyghur milliy herikitining rehbiri rabiye qadir xanim firansiye agéntliqining muxbirigha bergen bayanatida, 18-iyul xoten weqesidin yarilan'ghan halda qolgha chüshken 70 ke yéqin Uyghurning herbiy türme doxturxanisigha élip kétilgenlikini éytqan. U mundaq dégen:
-Xitay da'iriliri ularning hemmisini yighip, herbiy türme doxturxanisigha epketken. Bu yerde shunisi éniqki, herbiy türme doxturxanisigha élip kétilgen héchqandaq bir Uyghurning saq qaytip chiqqini yoq.

Rabiye qadir xanim xitaydiki bu xil herbiy türme doxturxanilirida jinayetchilerning sewebsizla ölüp qélish weqelirining xitaydiki ichki organ etkeschiliki bilen munasiwetlik bolushi mumkinlikini éytqan.

Xoten nawagh saqchixanisida yüz bergen weqede, xitay da'iriliri 18 kishining ölgenlikini élan qilghan idi. Emma rabiye qadir xanim xitay saqchiliri teripidin étip öltürülgen Uyghurlarning sanining téximu köp bolushi mumkinlikini bildürgen. U, xitay da'irilirining her qétimliq weqede gherbning tomurini tutidighanliqini, eger ulardin küchlük inkas kelmigen teqdirde, téximu heddidin éship kétidighanliqini eskertip, xelq'araliq kishilik hoquq organliri we démokratik döletlerni weqege diqqet qilishqa chaqirghan.