Xitay da'iriliri: xotendiki saqchixanigha hujum qilish weqesi pilanliq bir heriket

Xitayning tengritagh tori qatarliq uchur wasitiliride bu mezmundiki uchurlar élan qilindi. Bu uchurlarda saqchixanining bir Uyghur bashliqining sözliri misal qilin'ghan.

Shinxu'a agéntliqida élan qilin'ghan xewerde körsitilishiche, xoten nawagh saqchixanisining bashliqi ablet metniyaz bergen bayanatida, bu hujumchilarning weqeni baldurla pilanlap, weqedin ikki kün ilgiri saqchixana etrapida ehwal közetkenlikini, weqe yüz bergen waqitta saqchilarning köpinchisi sirtqa wezipe ötigili chiqip ketkenliktin, hujumchilarning shu pursetni gheniymet bilgenlikini éytqan.

Ablet metniyaz sözide, qollirida pichaq qatarliqlarni kötürüwalghan bu kishilerning köpinchisining bashqa shiwide sözleydighanliqini, yashliri 20-40 yashqiche bolghan erler ikenliki we ularning hemmisining qéchip kétishke asan bolush üchün yügürüsh ayighi kiyiwalghanliqini bildürgen.

18-Iyul xotendiki saqchixanida weqe yüz bergendin kéyin uzun ötmey xitay da'iriliri weqeni “Térrorluq hujumi” dep élan qilghan idi. Emma chet'ellerdiki Uyghur kishilik hoquq pa'aliyitining aliy orgini bolghan dunya Uyghur qurultiyi weqening saqchixana aldigha naraziliq namayishi qilish üchün yighilghan Uyghurlargha saqchilarning qalaymiqan oq chiqirishi we urushi bilen kélip chiqqan toqunushluqini bildürüp, xitay da'irilirining özining 18 Uyghurni sewebsizla étip öltürüshtek qilmishini yoshurush üchün weqeni térrorluq weqesi qilip körsitishke urunuwatqanliqini eskertti.