Xotende da'iriler saqchi ponkitigha tam qoshna Uyghur dukanlirini chéqiwétip, dukan igilirining naraziliqini qozghighan

Da'iriler xoten shehirige qarashliq arqachal yézisining chigilik kent bazirida yéngi sélin'ghan saqchi ponkitigha qoshna Uyghur dukanlirini chéqiwétip, dukan igilirining naraziliqini qozghighan.
Muxbirimiz erkin
2012.04.27

Weqedin xewerdar kishilerning radi'omizgha ashkarilishiche, da'iriler buningdin bir qanche ay burun Uyghurlarning chigilik kent baziridiki 3 dukini, yéngi sélin'ghan saqchi ponkitigha tam qoshna bolup qalghanliqini ilgiri sürüp, dukan igiliridin dukanni boshitip bérishini telep qilghan.

Da'iriler omumi kölimi 118 kwadrat métir kélidighan 3 dukan'gha 7 ming somdin 13 ming somghiche tölem béridighanliqini bildürgen. Biraq, dukan igiliri tölem pulidin razi bolmay, dukanni bikarlap bérishni ret qilghan.

Weqedin xewerdar uchur menbelirining ashkarilishiche, da'iriler 26‏-aprél chigilik kent baziridiki bu 3 Uyghur dukinini mejburiy chéqip tashlighan. Dukan igiliri bolsa xoten sheherlik hökümet organlirigha erz qilghan.

Közetküchilerning ilgiri sürüshiche, saqchi ponkiti Uyghur dukanliri bilen tam qoshna bolup qalghanliqidin bi'aram bolghan yerlik saqchi da'irilirining bixeterlikni közde tutup, Uyghur dukanlirini chéqip tashlighan bolushi mumkin.

Biz yerlik saqchi ponkitigha téléfon qilip buning sewebini igileshke urun'ghan bolsaqmu, biraq téléfonni alidighan adem chiqmidi.

Xitay da'iriliri ötken yili yazdin béri Uyghur élide arqa-arqidin yüz bergen hujum qilish weqeliridin kéyin, amanliq organlirining bixeterlikini qoghdashni ilgirilep kücheytken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.