Xu jintaw türkmenistanni ziyaret qildi

Xitay dölet re'isi xu jintaw qazaqistan sepirini axirlashturghandin kéyin, 13 - dékabir küni türkmenistan paytexti ashxabadqa yétip kélip, türkmen prézidénti qurban'gül berdimuhemmedof bilen körüshüp, ikki dölet hemkarliq munasiwiti heqqide pikir almashturdi hemde xitay bilen türkmenistan arisida bir qatar kélishimlar imzalandi.
Muxbirimiz ümüdwar
2009.12.13

B b s agéntliqining xewer qilishiche, bu qétim hasil qilin'ghan kélishimlar ichide xitay terepning türkmenistanning xitayda ishlen'gen yoluchilar poyizi wagonlirini sétiwélishi hemde türkmenistanning alaqe sistémisi qurulushi üchün töwen pirsent bilen qerz bérish pütüshümi bar iken.

Xitayning shinxu'a agéntliqining bu heqtiki xewiridin melum bolushiche, xu jintaw qurban'gül berdi muhemmedof bilen bolghan söhbitide ikki dölet munasiwetlirining tereqqiyatigha yuqiri baha bergen hemde énérgiye sahesidiki hemkarliqlarni téximu chongqurlitishni tekitligen shuningdek xitay - ottura asiya tebi'iy gaz turuba yolining normal xizmitini kapaletlendürüdighanliqini bildürgen.

Xu jintaw qurban'gül berdi muhemmedof bilen élip barghan söhbitide yene kona téma "üch xil küch"lerge ortaq zerbe bérish mesilisinimu untup qalmighan bolup, u, "üch xil küchlerning ottura asiyadiki pa'aliyetliri rayondiki her qaysi memliketlerning muqimliqi üchün éghir tehdit, junggo türkmenistan bilen bolghan hemkarliqni kücheytip, üch xil küchlerge zerbe bérishni xalaydu" dep körsetken.

Bu qétim yene xitay terep ikki memliketning ma'arip sahesidiki hemkarliqlirining ilgirilewatqanliqining ipadisi süpitide her yili türkmenistan'gha bériwatqan 45 kishilik xitay terepning oqush mukapat pulini 90 kishige köpeytkenlikini bildürgen prézidént qurban'gül berdi muhemmedofmu ikki dölet hemkarliqlirini mu'eyyenleshtürgen hemde xu jintawning sheripige ziyapet bergen.

Melum bolushiche, xu jintawning bu qétimliq ziyaritining tüp meqsiti énérgiye mesilisige baghliq bolup, xitay bilen türkmenistan arisida her yili 30 milyard kub métir tebi'iy gaz yetküzüsh kélishimi bar. Düshenbe küni türkmenistanning sahibxanliqida ashxabadta xitay, türkmenistan, özbékistan we qazaqistan rehberlirining ottura asiya - xitay tebi'iy gaz turubisini ishqa kirishtürüsh murasimi pa'aliyiti ötküzülüsh aldida turmaqta.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.