9‏-Ay yaponiye aptomobillirining xitayda sétilish miqdari shiddetlik chüshüp ketken

Bu yil 9‏-ayda bu yaponiye “MITSUBISHI” we “FUJI” shirketliri ishlepchiqarghan aptomobillarning xitayda sétilishi shiddetlik chüshüp, 60% tin artuq azayghan.
Muxbirimiz erkin
2012.10.05

Yaponiye kyuto agéntliqining xewer qilishiche, “MITSUBISHI” shirkiti 9‏-ayda 2340 dane aptomobil satqan bolup, ötken yilning oxshash mezgilidin 9.62 Pirsent az sétilghan. “FUJI” shirkiti 1857 dane aptomobil satqan bolup, uning sodisi 5.64 Pirsent chüshüp ketken. Buningdin sel burun “TOYOTA” shirkiti xitaydiki aptomobil sodisining 9-ayda 50% chüshüp ketkenlikini élan qilghan idi.

Yaponiye axbarat wasitilirining xewerliride, bu ehwalni yéqinda yüz bergen xitaydiki yaponiyige naraziliq weqeliri we yaponiye mallirini bayqut qilish herikiti keltürüp chiqarghanliqi ilgiri sürülgen. Bezi közetküchiler, yaponiye aptomobil sodisining bundaq shiddetlik chüshüp kétishi tasadipiyliq, dep qarimaydighanliqini ilgiri sürüp, yaponiye mallirini bayqut qilish herikitining arqisida xitay hökümitining qoli barliqidin guman qilidighanliqini bildürmekte.

Nöwette yaponiye bir tereptin, sénkaku arallirining igilik hoquqidin waz kechmeydighanliqini tekitlise, yene bir tereptin, xitay bilen bolghan jiddiychilikni peseytishke tirishmaqta. Yaponiye teptish da'iriliri jüme küni xitayning tokyoda turushluq elchixanisining 1‏-derijilik katipi li chun'gu'angning jinayi jawabkarliqini sürüshtürmeydighanliqini élan qilghan. Xitaygha qéchip ketken li chun'gu'ang jasusluq qilish bilen eyiblen'gen idi. Jüme küni yene, yaponiye mu'awin tashqi ishlar weziri koji suroka sh j a e munbirining yighinigha qatniship, arallar mesilisidiki ixtilapni xelq'ara qanunlargha asasen tinch hel qilishni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.