Японийә ички кабенти“дипломатийә көк ташлиқ китаби” ниң йеңи нусхисини тәстиқлиди

Японийә мәтбуатлириниң хәвәр қилишичә, бүгүн 6 - апрел күни японийә ички кабенти йиғин ечип, японийиниң 2012 - йиллиқ “дипломатийә көк ташлиқ китаби”ниң йеңи нусхисини тәстиқлиди.
Мухбиримиз меһрибан
2012.04.06

Әнгилийә б б с агентлиқиниң бу һәқтики хәвиридә дейилишичә, көк ташлиқ китаб омумий баян, корийә, америка, хитай қатарлиқ төт чоң мәзмунға бөлүнгән болуп, китабта японийиниң хәлқара дипломатик мунасивитидә башламчилиқ рол ойнишиниң муһимлиқи алаһидә тәкитләнди.

Көк ташлиқ китабта японийә билән хитай дипломатик мунасивәт орнатқан 40 йлдин буянқи икки дөләт мунасивити баян қилинип, хитай һөкүмитидин һәрбий һазирлиқлар мәлуматида йәниму очуқ - йоруқ болуш тәләп қилинған. Көк ташлиқ китабниң японийә - америка мунасивити қисмида, японийиниң бундин кейинки узун бир мәзгилгичә америка билән давамлиқ һәмкарлишидиғанлиқи, бу хил һәмкарлиқниң тинч окян райониниң муқим, тинч тәрәққиятиға пайдилиқ икәнлики алаһидә тәкитләнди.Көк ташлиқ китабниң корийә йерим арили вәзийити һәққидики қисмида, японийиниң шималий корийә рәһбири кимҗуңел вапат болғандин кейинки шималий корийә вәзийитигә йеқиндин диққәттә болуп келиватқанлиқи алаһидә әскәртилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.