Японийиликләр хитайға қарши намайиш қилди

16 - Өктәбир 3 миң әтрапида японийилик сенкаку арили мәсилидики хитайниң позитсийисигә қаршилиқ билдүрүп, токйо шәһиридә намайиш қилди.
Мухбиримиз җүмә
2010.10.16
Share on WhatsApp
Share on WhatsApp

Блумберг торида көрситишичә, намайишни япон милләтчилири тәшкилатиниң рә’иси, сабиқ японийә һава мудапиә қисимлириниң башлиқи тошио тамогами тәшкиллигән болуп, намайиш токйодики хитай әлчиханиси алдида елип берилған.

Хәвәрдә нәқил қилишичә, намайишқа қатнашқан осака шәһириниң сабиқ һөкүмәт мәслиһәтчиси хироши мияке “ хитай тинч ухлаватқан японийиликләрни ойғитивәтти” дегән.

Франсийә агентлиқидики хәвәрләргә қариғанда, намайишчилар “ японийә хәтәр ичидә”, “хитай таҗавузчилирини һәргиз кәчүрмәймиз” дегәндәк лозункиларни көтүрүп намайиш қилған.

Бу йил сентәбирдә бир хитай белиқчи кемиси японийиниң сенкаку арилиға йеқинла кәлгән вә шу җайдики японийә деңиз қоғдиғучилири билән тоқунушқан. Нәтиҗидә японийә деңиз қоғдиғучилири хитай белиқчиларни қолға алған. Башқа белиқчилар узун өтмәй қоюп берилгән болсиму, японийә да’ирилири хитай белиқчи кемисиниң капитанини 17 күн тутуп турғандин кейин, қоюп бәргән иди.

Бу хитай - японийә мунасивәтлирини еғир дәриҗидә йирикләштүргән. Хитай белиқчиси қоюп берилгәндин кейинму бир қисим японийиликләр японийә да’ирилириниң хитайға юмшақ дипломатийә қолланғанлиқини илгири сүрүп, наразилиқ намайиши қилған иди.

20 Сентәбир хитай да’ирилири 4 нәпәр японийә пуқрасини һәрбий орунларни қанунсиз рәсим тартиш җинайити билән тутуп қалған. Буларниң 3 нәпири қоюп берилгән болсиму, бир нәпирини 9 өктәбиргичә тутуп турған иди.

Шәнбә күндики намайишқа 3200 адәм қатнашқанлиқини илгири сүрүлгән. 31 яшлиқ намайишчи юко ямано’и “ хитайниң сенкаку мәсилигә 4 японийиликни гөрүгә еливелиш йоли билән қайтурған инкаси, мени бәк ғәзәпләндүрди” дегән вә бундин кейин хитай мәһсулатлирини байқут қилип хитайдин импорт қилинған һәрқандақ нәрсини алмайдиғанлиқини илгири сүргән.

Хитай ахбаратида көрситишичә, хитайниң сичүән өлкиси чеңду шәһиридә японийигә қарши намайиш елип берилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.