Yaponiyilikler xitaygha qarshi namayish qildi

16 - Öktebir 3 ming etrapida yaponiyilik sénkaku arili mesilidiki xitayning pozitsiyisige qarshiliq bildürüp, tokyo shehiride namayish qildi.
Muxbirimiz jüme
2010.10.16

Blumbérg torida körsitishiche, namayishni yapon milletchiliri teshkilatining re’isi, sabiq yaponiye hawa mudapi'e qisimlirining bashliqi toshi'o tamogami teshkilligen bolup, namayish tokyodiki xitay elchixanisi aldida élip bérilghan.

Xewerde neqil qilishiche, namayishqa qatnashqan osaka shehirining sabiq hökümet meslihetchisi xiroshi miyaké “ xitay tinch uxlawatqan yaponiyiliklerni oyghitiwetti” dégen.

Fransiye agéntliqidiki xewerlerge qarighanda, namayishchilar “ yaponiye xeter ichide”, “xitay tajawuzchilirini hergiz kechürmeymiz” dégendek lozunkilarni kötürüp namayish qilghan.

Bu yil séntebirde bir xitay béliqchi kémisi yaponiyining sénkaku ariligha yéqinla kelgen we shu jaydiki yaponiye déngiz qoghdighuchiliri bilen toqunushqan. Netijide yaponiye déngiz qoghdighuchiliri xitay béliqchilarni qolgha alghan. Bashqa béliqchilar uzun ötmey qoyup bérilgen bolsimu, yaponiye da’iriliri xitay béliqchi kémisining kapitanini 17 kün tutup turghandin kéyin, qoyup bergen idi.

Bu xitay - yaponiye munasiwetlirini éghir derijide yirikleshtürgen. Xitay béliqchisi qoyup bérilgendin kéyinmu bir qisim yaponiyilikler yaponiye da’irilirining xitaygha yumshaq diplomatiye qollan'ghanliqini ilgiri sürüp, naraziliq namayishi qilghan idi.

20 Séntebir xitay da’iriliri 4 neper yaponiye puqrasini herbiy orunlarni qanunsiz resim tartish jinayiti bilen tutup qalghan. Bularning 3 nepiri qoyup bérilgen bolsimu, bir nepirini 9 öktebirgiche tutup turghan idi.

Shenbe kündiki namayishqa 3200 adem qatnashqanliqini ilgiri sürülgen. 31 Yashliq namayishchi yuko yamano’i “ xitayning sénkaku mesilige 4 yaponiyilikni görüge éliwélish yoli bilen qayturghan inkasi, méni bek ghezeplendürdi” dégen we bundin kéyin xitay mehsulatlirini bayqut qilip xitaydin import qilin'ghan herqandaq nersini almaydighanliqini ilgiri sürgen.

Xitay axbaratida körsitishiche, xitayning sichüen ölkisi chéngdu shehiride yaponiyige qarshi namayish élip bérilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.