Японийә билән хитай б д т йиғинида бир-бири билән қаттиқ законлашти

Хитай ташқи ишлар министири яң җйечи б д т омуми йиғинида қилған сөзидә сенкаку яки дявйү арили мәсилисини тилға елип, японийини тәнқид қилған вә японийиниң сенкаку арилини җуңгодин тартивалғанлиқини илгири сүргән. Бирақ японийиниң б д т да турушлуқ муавин әлчиси казу кодама яң җйечиниң сөзигә җавабән сөзгә чиқип, хитай тәрәпниң сөзиниң һечқандақ мәнтәқә асаси йоқлуқини билдүргән.

Яң җйечи б д т омуми йиғинида қилған сөзидә “дявйү вә униң әтрапидики араллар әзәлдин тартип җуңго земини. Шуңа җуңгониң бу аралларда һечқандақ талаш-тартишсиз игилик һоқуқи бар. японийә бу аралларни 1895‏-йил җяву урушида тартивалған” дегән иди.

Бирақ казу кодама “японийә сенкаку арилиға игидарчилиқ қилғанда, бу арал хитайниң контроллуқида әмәс иди. Шуңа хитайниң пикри мәнтәқә җәһәттин пут тирәп туралмайду” дегән. Униң арқисидин хитайниң б д т да турушлуқ вәкили ли бавдоң сөзгә чиқип, кодаманиң сөзлири “тарихни бурмилиғанлиқ, бу бир милярд 300 милйон җуңго хәлқиниң ғәзипини қозғайду. Җуңго бу мәсилидә һәргиз йол қоймайду” дәп көрсәткән.

Японийә вәкили болса бу араллар “японийиниң тәбиий земини икәнликидә һечқандақ шүбһә йоқлуқи” ни билдүргән. Ли бавдоң кодамаға һуҗум қилип, “японийиниң тарихтики таҗавузчилиқ вә мустәмликичилик һәрикитидин униң һечқандақ номус қилмайватқанлиқини” тәкитлигән. Кодама ли бавдоңға рәддийә берип, униң 2‏-дуня урушини пәш қилиши “шүбһилик вә пайдисиз” дәп көрсәткән.