Хитай аһалиләрниң дөләт йеридики өйини елиш вә толуқлима бериш һәққидә йеңи бәлгилимә чиқарди

Шинҗаң гезитиниң 10-авғуст күнидики хәвиридин мәлум болушичә, хитай йеқинда йәнә бир йеңи бәлгилимә чиқирип аһалиләрниң аталмиш дөләт йеридики өйлирини елиш вә толуқлима бериш һәққидә бир қатар йеңи түзүмләрни бекиткән.
Мухбиримиз шөһрәт һошур
2012.08.13

Йеңи бәлгилимидә өйни елиш вә толуқлима бериштә қарар демократик болуш, тәртип тоғра болуш вә нәтиҗә ашкара болуш принсип қилинған. Толуқлимида адил болуш асаси мәқсәт дәп бекитилгән. Бәлгилиминиң 5-қошумчә маддисида өйни елиш вә толуқлима бериш һоқуқи наһийилик вә шәһәрлик һөкүмәткә берилгән, әмма һөкүмәтниң алақидар органларни өйләрни мәҗбурий чеқишқа буйрушиға йол қоюлмайдиғанлиқи әскәртилгән.

Бу йеңи бәлгилимә қәғәз йүзидики ипадисидә, аһалиләрниң мәнпәитигә һөрмәт қилинидиғандәк көрүнсиму, әмма хитайниң һакимийәт әнәниси мәзкур шоарларниң әмәлийлишиш еһтималлиқида гуман пәйда қилмақта. Мәлум болушичә, ақсу шәһириниң игәрчи йезисидики аһалиләр өй чеқишниң зиянкәшликигә әң еғир учриған болуп, бу йезидики 3000 дин артуқ аилә йеқинқи 5 йил ичидә өй-маканлиридин айрилип, шәһәрниң чәт-яқилириға сүрүветилгән. Буниңға наразилиқ билдүргән йүзлигән кишиләр нөвәттә ақсуниң түрмә вә қамақханилирида җаза муддитини өтимәктә.

Хитайниң өй чеқиш һәққидики йеңи бәлгилимисидә, бурун зиянкәшликкә учриған аилиләргә төләм берилидиған яки берилмәйдиғанлиқи һәққидә тохталмиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.