Yaponiyidiki yer tewresh we déngiz tashqinida ölgen, iz déreksiz yoqap ketkenler 17 mingdin ashti

Yaponiyide yüz bergen 11-marttiki yer tewresh apiti we déngiz tashqinida ölgen, iz déreksiz yoqap ketkenlerning 17 mingdin ashqanliqi élan qilindi.
Muxbirimiz erkin
2011.03.18

Yaponiye saqchi da'irilirining jüme küni élan qilghan melumatidin ashkarilinishiche, 17 ming kishining ichidin resmiy ölgenliki éniqlan'ghanlar 6911 ge yetken. Buning bilen hazirghiche bu qétimqi apette ölgenliki éniqlan'ghan adem sani 1995-yili yaponiyining kobi shehiride yüz bergen yer tewresh apitide ölgenlerdin éship ketti. 1995-Yili 1-ayda yüz bergen kobidiki 2.7 Bal yer tewresh apitide 6434 adem ölgen.

Yaponiye miyagi nahiyisining déngiz boyidiki ishinomaki sheherchisining bashliqi mezkur sheherchining özidinla iz‏-déreksiz yoqap ketkenlerning 10minggha yétidighanliqini ilgiri sürgen.

Lékin, yaponiyiliklerni qorqutuwatqan nöwettiki eng xeterlik mesile, tokyogha 200 kilométir yiraqliqtiki fukushima yadro istansisining yadro ré'aktor qazanliridiki radi'aktip nökchilerni sowutush xizmitining ongushsizliqqa uchrap, yadro apiti peyda qilish xewpidur. Yaponiye bash ministiri na'oto kan jüme küni muxbirlargha bayanat bérip, fukushima yadro istansisidiki weziyetni“Nahayiti éghir” dep körsetti.

Istansisidiki 3 ré'aktor qazinining aptomatik sowutush sistémisi kardin chiqqandin kéyin, ré'aktor qazanlirining qépi we ré'aktor qazinidiki radi'aktip nökchilerning érip, yadro apiti peyda qilish xewpi barghanséri kücheygen. Nöwette téxnik xadimlar ré'aktor qazanlirining aptomatik sowutush sistémisini rémont qilip, eslige keltürüshke tirishmaqta. Shuning bilen birge, ré'aktor qazanlirining su tankisigha ot öchürüsh mashinilirida déngiz süyi yollisa, herbiy tik ucharlarda su toshup kélip, ré'aktor qazanlirigha tökmekte iken.

Xelq'ara atom énérgiye idarisi jüme küni tokyo etrapidiki radi'aktip miqdarining töwenleshke bashlighanliqini élan qilip, radi'aktip miqdarining normaldikidin yuqiri bolsimu, lékin salametlikke xewp yetküzüsh sewiyiside emeslikini, biraq fukushima rayonida hawadiki radi'aktip miqdari yenila yuqiri ikenlikini bildürgen. Yaponiye hökümiti fukushima da'ichi yadro istansisining 20 kilométir etrapidiki puqralarni tarqaqlashturghan, 30 kilométir néridiki puqralarning talagha chiqmasliqini telep qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.