Xitay bu yilliq herbiy xam chotini yene ikki reqem köpeytti

Xitay xel qurultiyi jüme küni xitayning bu yilliq herbiy xam chotining yene ikki reqem köpeytilgenlikini élan qilip, az kem 92 milyard dollargha chiqardi.
Muxbirimiz erkin
2011.03.04

Xitay xelq qurultiyining bayanatchisi li jawshing muxbirlargha élan qilghan bu heqtiki bayanatida, bu yilliq herbiy xam chotning 7.12 Pirsent köpeytilip, 601 milyard 100 milyon yüen we yaki 7.91 Milyard dollargha chiqirilghanliqini bildürgen. Xitayning 2010-yili mustesna yéqinqi on nechche yildin buyanqi herbiyge ajratqan mudapi'e xam choti izchil 2 reqemlik köpiyip, xitaygha qoshna ellerni endishige sélip kelgen idi.

Amérika we xitay herbiy xam chotining izchil köpiyip bériwatqanliqidin endishe qilip kéliwatqan qoshna eller, xitayning jiddiy tashqi tehditke duch kelmigen ehwalda herbiy xam chotni izchil 2 reqem bilen köpeytip méngishidiki muddi'asidin gumanlinip keldi. Lékin, li jawshing jüme künki axbarat yighinida xitayning herbiy sélinmisini aqlap “Herbiy xam chotni kontrol qilishqa izchil diqqet qilip kéliwatqanliqi” ni bildürgen. U “Buning héchqandaq döletke tehdit salmaydighanliqi ” ni ilgiri süridu.

Analizchilarning eskertishiche, xitay herbiy xam chotining bu yil yene 2 reqem bilen östürüshke bashlighanliqi “Xitay herbiy küchining éshiwatqanliqi” we shundaqla “Ularning rusiye hem amérika bilen bolghan perqni azaytishqa urunuwatqanliqi ”din dérek béridiken.

Analizchilar yene, xitayning nöwettiki herbiy sélinmisi uning teywenni ishghal qilish, Uyghur, tibet we ichki qisimdiki yüz béridin tasadipi isyanlarni basturush iqtidaridin éship ketkenlikini ilgiri sürüp, buning amérika we asiyadiki xitaygha qoshna ellerni endishige séliwatqanliqini bildürmekte.

Endishige chüshken döletlerning biri yaponiyidur. Yaponiye tashqi ishlar ministiri seyji méxara, jüme küni xitayning herbiy xam chotidin endishige chüshkenlikini tekitligen. U, xitayning bu pulni qandaq qorallargha serp qilidighanliqigha diqqet qilidighanliqini eskertidu. Yene bezi analizchilarning periziche, xitayning emeliyettiki herbiy xam choti u ashkara élan qilghan sandin köp bolushi mumkin.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.