Uyghur ilidiki yingne hujumlirida zeherlik madda bayqalmidi

Shinxu'a axbarat agéntliqi bu heqtiki xewiride, hujumgha uchrighan dep qaralghan 250 adem üstidin tekshürüsh élip bérilghanliqini, lékin bu kishilerning qan terkipide radi'aktipliq, zeherlik yaki ziyanliq maddilar bayqalmighanliqini bildürgen.

Xitay da'irilirining bu iqrari ürümchidiki bir ottura sot mehkimisi shenbe küni yingne hujumini bahane qilip, 3 Uyghurni 7 yildin 15 yilghiche muddetlik qamaq jazasigha höküm qilghandin kéyin élan qilindi. Xitay j x ministiri méng jyenju ilgiri bu weqeni "milliy bölgünchilerning herikiti" dep eyibligen, lékin u bu pikirini ispatlaydighan héchqandaq pakit otturigha qoymighan idi. Uyghur aptonom rayoni da'iriliri bolsa weqe sadir qilghuchilarni téz arida tépip chiqip, ölüm jazasigha höküm qilidighanliqini jakarlighan.

Shinxu'a agéntliqining xewiride ürümchi sheherlik j x idarisining emeldari wang wénshyenning "yingne okuli hujumgha uchrighuchilarning salametlik ehwaligha chong zexmet yetküzmigen, lékin bu weqe ijtima'iy sarasim peyda qildi" dégenlikini bildürgen.

Dunya Uyghur qurultiyi bolsa, yingne weqesini xitay köchmenlirining hökümettin tölem pul élish üchün peyda qilghanliqini, nurghun xitaylarning öz özige yingne sélip, saqchigha dilo melum qilghanliqini ilgiri sürgen. Xitay hökümiti bolsa 4 ‏- sintebirge qeder 531 neper kishining yingne hujumigha uchrighanliqini élan qilip, buning ichidiki 171 kishide yingne izi barliqini bildürgen idi.