Xotende yulun yallughi wirusi bilen yuqumlan'ghan toqquz balining biri öldi

Dunya sehiye teshkilatining jüme küni, xotende Uyghur tébabetchilikide yulun yallughi wirusi dep atilidighan, xelq'arada bir tipliq poli'o wirus dep atalghan wirustin yuqumlan'ghan balilarning toqquzgha yetkenlikini, ularning ichidin bir balining ölgenlikini bildürdi.
Muxbirimiz erkin
2011.09.09

Xitay sehiye ministirliqi bolsa mezkur wirusning hazirgha qeder xotendin bashqa jaylarda bayqalmighanliqini eskertip, dunya sehiye teshkilati wirusning pakistandin tarqalghanliqini mu'eyyenleshtürgenlikini ilgiri sürgen.

Dunya sehiye teshkilati, palechlikni keltürüp chirqirighan mezkur wirusning génitik jehettin pakistanda bayqalghan wirus tipigha oxshaydighanliqini bildürgen. Xoten yerlik sehiye organliri bu yil 7‏-ayda 4 ayliqtin 2 yashqiche bolghan 4 balining mezkur wirustin yuqumlan'ghanliqini bayqighan idi.

Xitay sehiye ministirliqining ilgiri sürüshiche, wirus ademge yuqumlan'ghan yémeklik we su arqiliq éghizdin yuqidiken. Biraq, bu wirusning qandaq qilip, xotendek Uyghurlar köp sanliqni igileydighan, siyasiy weziyiti intayin nazuk bir rayon'gha tarqalghanliqi melum emes.

Sehiye ministirliqi jüme küni bayanat élan qilip, mezkur wirustin yuqumlan'ghan qalghan 8 balini dawalawatqanliqini we ularning hayati xewp astida emeslikini bildürgen shundaqla bir mutexessisler ömikini peyshenbe küni xoten'ge yollighan.

Yerlik axbarat wasitilirining bu heqtiki xewerliride aptonom rayonning mu'awin re'isi tiliwaldi abduréshitning mezkur ümekke hemrah bolup xoten'ge barghanliqini bildürdi.

Dunya sehiye teshkilatining bildürüshiche, xitay sehiye ministirliqi xotende 15 yashtin töwen balilargha, xotendin bashqa jaylarda 5 yashning töwinidiki balilargha waksina uridighanliqini élan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.