Tunusning 24 yilliq istibdat prézidénti zeynul-abidin bin aliy dölitidin qachti

24 Yildin buyan tunista hakimiyet sorap kelgen prézidént zeynul-abidin bin aliy xelq herikitining bésimida jüme küni ayropilan'gha olturup dölitidin ayrilghan.
Muxbirimiz erkin
2011-01-14
Share

Uning qaysi terepke ketkenliki hazirgha qeder melum emes. Xelq'ara axbarat wasitilirining xewer qilishiche, tunus bash ministiri muhemmet ghanuchi waqitliq prézidéntliqni ötküzüwalghanliqini jakarlighan. Bu heqtiki xewerlerde bin alining shu yerning waqti bilen jüme küni kechte ayropilan'gha olturup dölitidin ayrilghanliqi, herbiy da'irilerning ayrodrom we tunus hawa boshluqini uchushqa taqighanliqi ilgiri sürülgen.

Da'iriler jüme kündin bashlap memliket boyiche jiddiy halet élan qilip, ammiwi yighilishni chekligen shundaqla bixeterlik küchlirige xilapliq qilghuchilarni basturush hoquqi bergen. Yéqinqi bir qanche heptidin béri tunista keng kölemlik xelq namayishi partlap, mal bahasining ösüp kétishi we ishsizliqqa naraziliq bildürgen.

Namayishchilar prézidénti bin alining istépa bérishini telep qilghan idi. Bu jeryanda namayish tereqqiy qilip, qoralliq küchler bilen namayishchi amma arisidiki toqunushqa aylan'ghan. Toqunushta nurghun adem ölgen bolsimu, lékin ölgüchilerning héqiqi sanigha da'ir melumatlar her xil bolup, xelq'ara kishilik hoquq fédératsiyisi peyshenbe kün'ge qeder 66 ademning ölgenlikini ilgiri sürgen idi.

Bezi metbu'atlarning yerlik doxturxana da'iriliridin neqil keltürüp bergen xewerliride peyshenbe küni bir künning özidila 13 ademning ölgenliki ilgiri sürülgen.

Bin aliy peyshenbe küni tunus bixeterlik küchlirige namayishchilargha qaritip oq chiqarmasliq toghrisida buyruq chüshürgen idi. Bu qétimqi namayish aldi bilen tunusning ötken yili dékabirda tunusning sidi bozid rayonida yüz bergen. Namayish kochida mal sétiwatqan 26 yashlardiki bir aliy mektep püttürgen oqughuchining mélini saqchilarning musadire qilishigha narazi bolup, özige ot qoyup bérishi bilen bashlan'ghan idi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet