Qumuldiki ma'arip xadimi: “Memet éli mu'ellimning délosi jem'iyet muqimliqi mesilisige chétishliq”

Muxbirimiz shöhret hoshur
2020.04.01
memtimin-eli.jpg Qumul pédagogika mektipi oqutush ishliri bölümining mudiri, xettat memet éli.
Social Media

Ötken hepte féysbukta qumul pédagogika mektipi oqutush ishliri bölümining mudiri, xettat memet élining bir yildin buyan iz-dériki yoqluqi heqqide uchur bérildi. Muxbirimizning qumul wilayetlik we sheherlik ma'arip idarisi we mezkur mektepke qarita élip barghan téléfon ziyaretliri dawamida memet élining tutqunda ikenliki delillendi.

Féysbuk qatarliq ijtima'iy taratqularda bayan qilinishiche, qumul wilayetlik pédagogika mektipi oqutush bölümining mudiri memet éli 2019‏-yili 22‏-mart küni tutqun qilin'ghan we shu kündin buyan uning nede tutup turuluwatqanliqi we qandaq bir terep qilin'ghanliqi heqqide jem'iyette héchqandaq uchur bolmighan.

Téléfonimizni qobul qilghan qumul pédagogika mektipining bir xadimi memet élining ish ornida bar yaki yoqluqini sorighinimizda, u “Yoq” dep jawab berdi. Biz uningdin memet élining qachandin béri ish ornida yoq ikenlikini sorighinimizda u bu heqte mektepning intizam tekshürüsh bölümidin melumat élishimizni tewsiye qildi. Biz uningdin memet élining tutqundin qoyup bérilgen yaki bérilmigenlikini sorighinimzida u bu heqte téléfonda jawab bérishke bolmaydighanliqi, uchur élishimiz üchün mektepke bérishimiz kéreklikini eskertti.

Téléfon ziyaretlirimiz dawamida weziyettin xewerdar kishilerdin biri memet élining 1987-yili shinjang uniwérsitétining edebiyat fakultétini püttürgenliki, uning tejribilik bir edebiyat oqutquchisi bolush bilen bille qumulda közge körün'gen bir medeniyet tetqiqatchisi ikenlikini tilgha aldi. Téléfonimizni qobul qilghan qumul pédagogika mektipi partikomining intizam tekshürüsh xadimi memet élining téxi ishqa chüshmigenlikini ashkarilidi. Emma u memet élining qachandin béri xizmettin ayrilghanliqi heqqidiki so'alimizgha jawab bermidi.

Weziyettin xewerdar kishining eskertishiche, memet éli yene usta xettat bolup, qumulda 2014 ‏-yilliri pédagogika mektipining qarmiqida tesis qilin'ghan tejribe ottura mektepte qoshumche xettatliq dersi bergen iken.

Qumul sheherlik ma'arip idarisining bir xadimi memet élining délosining sezgür délo ikenlikini bayan qilip, bu heqte munasiwetlik rehberlerning testiqini alghandin kéyinla jawab béreleydighanliqini tekitlidi.

Bu xadimmu qumul pédagogika mektipide memet éli isimlik bir oqutquchining bolghanliq, uning nöwette xizmet ornida yoq ikenlikini yoshurmidi.

Weziyettin xewerdar kishining yene bayan qilishiche, memet éli qumul pédagogika mektipi bashqurushidiki tejribe ottura mektepke qeshqer we xotenlerdin oqughuchi qobul qilishqa mes'ul bolghan. U bu jeryanda mezkur oqughuchilar we ularning a'ile-tawabi'atlirining siyasiy arqa körünüshini nezerge almighanliqi üchün ötken yilning béshida bir qétim da'iriler teripidin bir qétim soraqqa tartilghan.

Axirida téléfonimizni qobul qilghan qumul wilayetlik ma'arip bashqarmisining bir xadimi memet éli délosining jem'iyet muqimliqigha chétishliq ikenlikini, shunga bu déloning tepsilati we memet élining ehwali heqqide uchur bérelmeydighanliqini éniq halda tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.