Mutexessisler xitayning "2021-Yilliq qurban héytliq axbarat yighini" gha inkas qayturdi

Muxbirimiz méhriban
2021-07-21
Share
Mutexessisler xitayning Xitay merkizi téléwiziye istansisi neq meydandin tarqatqan, qarghiliq nahiyeside ötküzülgen qurban héytliq pa'aliyet körinishi
Social Media

 Bu yilliq qurban héyt mezgilide, xitay hökümet taratquliri we ijtima'iy alaqe munberliride Uyghur diyaridiki musulmanlarning atalmish "Milletler ittipaqliqi asasida qurban héyt tebriklen'genliki", "Her millet xelqining xoshal-xoram keypiyatta qurban héytni kütüwalghanliqi" keng teshwiq qilindi. 

Birnechche kündin buyan xitay xewerliri bilen ijtima'iy taratqularda keng tarqalghan sin filimliride Uyghurlarning qeshqer, ürümchi, ghulja qatarliq sheherlerdiki meschit we meydanlarda qurban héytliq "Sama usuli" oynawatqan körünüshliri, shundaqla "Rayondiki her millet xelqining öz'ara héytliship, hemme jayning héyt keypiyatigha tolghanliq" körünüshliri qayta-qayta teshwiq qilindi. 

20-Iyul küni yene Uyghur aptonum rayonluq hökümet da'iriliri mexsus axbarat élan qilish yighini ötküzgen. Yighinda atalmish "Uyghur guwahchi" lar sözge chiqirilip, "Uyghurlarning diniy étiqad erkinliki toluq kapaletke ige", "Islam dinigha étiqad qilidighan her millet xelqi qurban héytni diniy qa'ide- yosunlar boyiche erkin we xoshal ötküzmekte" dégen mezmundiki sözlerni qilip, xitay hökümitining siyasitini medhileshke sélin'ghan. 

Qelbinur sidiq xanim 2019-yilining axiri gollandiyege kelgendin buyan,  özi oqutquchiliq qilghan lagérda körgen ehwallarni dunyagha ashkarilighan lagér shahitlirining biridur. 

Qelbinur sidiq xanim bügün ziyaritimizni qobul qilip,xitay hökümitining bu xil teshwiqatlirini "Pütünley yalghanchiliq" dep eyiblidi. 

U 2017-2018-yilliri we 2019-yillarda Uyghurlarning roza héyt we qurban héyt  qatarliq diniy bayramlarni ötküzüshtin pütünley cheklen'genlikini bildürdi. 

Uning tekitlishiche, en'eniwiy diniy bayramlarni ötküzüshtin cheklen'gen Uyghurlar oxshash mezgillerge toghra kelgen xitayning zongza bayrimi qatarliq bayramlarni  ötküzüshke mejburlan'ghan. 

Dunya Uyghur qurultiyi xitay ishliri komitétining mudiri ilshat hesen ependimu ziyaritimizni qobul qilip, xitay hökümitining bu yilliq qurban héytliq teshwiqati we axbarat yighinining mahiyiti heqqide toxtaldi  

Uning qarishiche, yillardin buyan Uyghurlarning diniy étiqadi we milliy bayramlirigha cheklime qoyup kéliwatqan, hetta yéqinqi 3 yilda Uyghurlarning bu xil bayramlarni ötküzüshini qattiq chekligen xitay hökümitining bu yilliq qurban héyt mezgilide teshwiqatni kücheytip, hetta axbarat élan qilish yighinlirini uyushturushi, xelq'aradin kéliwatqan bésim sewebidin bolghan iken. 

Ilshat hesen ependining bildürüshiche, xitay hökümitining bu xil saxta teshwiqat xewerlirini bazargha sélishi, özining Uyghurlargha yürgüziwatqan "Irqiy qirghinchiliq" siyasitini aqlash üchün iken. 

Ilshat hesen ependi sözide yene xitay hökümitining tiyatér sheklini alghan bu xil teshwiqatlirining yalghanchiliq mahiyitini échip körsetti. 

Élshat hesen ependining tekitlishiche, xitay hökümiti bu xil saxta teshwiqatlarni meyli qandaq shekilde élip bérishidin qet'iynezer, dunyani hergizmu aldiyalmaydikin. Emma xitay hökümiti bilen bolghan iqtisadiy munasiwetlerdin waz kéchelmeydighan bir türküm döletler, bolupmu musulman elliri yenila xitay hökümitining Uyghurlarni basturushigha köz yumup, xitayning bu xil yalghan teshwiqatlirigha meydan hazirlimaqta iken.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet