Истанбулда яшаватқан уйғурлар қурбан һейтни тәбрикләш паалийитидә җәм болди

Ихтиярий мухбиримиз арслан
2022.07.12
Share on WhatsApp
Share on WhatsApp
Истанбулда яшаватқан уйғурлар қурбан һейтни тәбрикләш паалийитидә җәм болди Истанбулдики хәлқара шәрқий түркистан тәшкилатлар бирликиниң уюштуруши билән өткүзүлгән қурбан һейтни тәбрикләш паалийитидин көрүнүш. 2022-Йили 11-июл, түркийә.
RFA/Arslan

Бу йилқи қурбан һейтниң 3-күни йәни 11-июл дүшәнбә күни истанбулдики хәлқара шәрқий түркистан тәшкилатлар бирликиниң уюштуруши билән истанбулда қурбан һейт тәбрикләш паалийити өткүзүлди. Паалийәт зәйтинбурну саһилидики казличәшмә күлтүр сәнәт мәркизиниң мәйданида уюштурулған болуп, паалийәттә шәрқий түркистан иҗтимаий тәшкилатларниң рәһбәрлири, әзалири вә истанбулда яшаватқан уйғурлардин әр-аял, яш өсмүрләр вә балилар болуп көп санда киши җәм болди.

Паалийәт қуран кәрим тилавити билән башланди. Кейин шәрқий түркистан маарип вә һәмкарлиқ җәмийити рәиси һидайәтуллаһ оғузхан сөз қилип уйғурларниң қурбан һейт байримини тәбриклиди.

Һидайәтуллаһ оғузхан сөзидә бир йәргә җәм болуп һейтлишишниң әһмийити тоғрисида тохталди, у сөзидә бир дастиханға җәм болуп һейтлишишниң қериндашлиқ риштисини күчәйтидиғанлиқини, буниң муһаҗирәттики һаятта уйғурларниң миллий вә исламий кимлики, өрп-адәтлири вә қиммәт-қарашлирини йоқатмаслиқниң символи икәнликини тәкитлиди.

Һидайәтуллаһ оғузхан бу һейтлишиш паалийитигә нурғунлиған уйғурларниң қатнишип мәйданға лиқ толғанлиқини көрүп сөйүнгәнликини ипадилиди вә мундақ деди: “бу, бирликимиз, иҗтимаий һаятта көрсәткән бирликимиздур. Бу, буниңдин кейинки сиясий истиқбалимиз, шәрқий түркистанниң азадлиқи, етник, сиясий, иҗтимаий, әхлақи, мәдәнийәт, өрп-адәт қиммәтлирини қоғдашта бир сәп болалайдиғанлиқимизни ипадиләйдиған биринчи қәдәм”.

Истанбулда өткүзүлгән қурбан һейтни тәбрикләш паалийитидә шәрқий түркистан маарип вә һәмкарлиқ җәмийити рәиси һидайәтуллаһ оғузхан сөз қилди. 2022-Йили 11-июл, түркийә.
Истанбулда өткүзүлгән қурбан һейтни тәбрикләш паалийитидә шәрқий түркистан маарип вә һәмкарлиқ җәмийити рәиси һидайәтуллаһ оғузхан сөз қилди. 2022-Йили 11-июл, түркийә.
RFA/Arslan

Һидайәтуллаһ оғузхан сөзидә йәнә уйғур дияридики түрмиләрдә, лагерларда зулум чекиватқан уйғурларниң чәтәлләргә чиқип кәткән уйғурлардин үмид күтидиғанлиқини хатириләтти вә чәтәлләрдә яшаватқан уйғурларниң һәр бириниң өз вәтининиң бир вәкили, бир әлчиси болуп бу җәһәттики мәсулийитини ада қилиши керәкликини тәкитлиди.

Паалийәттә йәнә шәрқий түркистан өлималар бирликиниң рәиси доктур атавулла шаһяр сөз қилип, уйғурларниң қурбан һейтини тәбриклиди вә қурбан һейтини тәбрикләшни бир оюн-тамаша дәп қаримастин бәлки өз-ара ярдәмлишиш вә ибадәт дәп билиш керәкликини тәкитлиди.

Доктур атавулла шаһяр сөзидә йәнә қурбан һейтиниң уйғурларниң миң йилдин буян давам қилип келиватқан миллий байрими икәнликини тәкитләп мундақ деди: “қурбан һейт биз уйғур хәлқиниң миң йиллардин бири бизниң миллий пүтүнлүкимизгә, миллий кимликимизгә орнап кәткән бир байримимиз болуп, бу һәм бир ибадәт, һәм миллитимизниң бирликтә миллий өрүп-адәтлиримизни, миллий кимликимизни яшнитишниң әң муһим бир паалийити”.

У сөзидә йәнә қурбанлиқ қилишниң әһмийити тоғрисида тохтилип мундақ деди: “қурбанлиқ қилиш әң қиммәтлик мал-мүлкимизни алла йолида пида қилиш, бу арқилиқ аллаға йеқинлишишни изһар қилиш дегәнлик болиду”.

Кейин яш өсмүр балилар сәһнигә чиқип қурбан һейтқа мунасивәтлик шеир декламатсийә қилди.

Паалийәткә қатнашқан йәсәвий алпәрәнләр тәшкилатиниң рәиси куршат миҗан, түрк журналист халис өздемир қатарлиқлар сөз қилип уйғурларниң қурбан һейтини тәбриклиди вә қошумчә қилип, шәрқий түркистан мәсилиси тоғрисида пикир баян қилип һәр вақит уйғурларни қоллап йенида болидиғанлиқини ипадиләшти.

Һейтлишиш паалийити җәрянида җамаәт әрбаби абдуқадир япчан сөз қилип уйғурларниң қурбан һейтини тәбриклиди вә мундақ деди: “бүгүн бу йәрдә һейтлишиш мунасивити билән шәрқий түркистанлиқлар йиғилған бир күн, лекин, бүгүн шәрқий түркистанда хәлқимиз, қериндашлиримиз зулумға учрап түрминиң ичидә, лагерларда азаб чекиватқанлиқи үчүн бүгүн бу хурсәнлик күндә бизниң көңлимиз йерим болуватиду”.

У сөзидә бүгүн һейтни тәбрикләштин ибарәт хушаллиқ күн болсиму қериндашлиримиз зулум чекиватқанлиқи үчүн биз хушал болалмай көңлимиз йерим болуватиду, деди.

Паалийәт җәрянида яш-өсмүрләрни хушал қилиш үчүн һейтлиқ һәдийә тарқитилди.

Паалийәт ахирида балилар үчүн уйғурлар вә шәрқий түркистанниң тарихи, җуғрапийәси вә рәһбәрлири тоғрисида соал-җаваблиқ зеһин синаш мусабиқиси өткүзүлди. Соалларға тоғра җаваб бәргәнләргә нәқ пул билән мукапат тарқитилди.

Паалийәт тамақ зияпитидин кейин хушал кәйпият ичидә ахирлашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.