«خەلقئارا ئۇيغۇر تەتقىقاتى ژۇرنىلى» نىڭ راھىلە داۋۇت مەخسۇس سانى نەشردىن چىقتى

ئىختىيارىي مۇخبىرىمىز ئەركىن تارىم
2021-01-07
Share
«خەلقئارا ئۇيغۇر تەتقىقاتى ژۇرنىلى» نىڭ راھىلە داۋۇت مەخسۇس سانى نەشردىن چىقتى تۈركىيەدە چىقىۋاتقان «خەلقئارا ئۇيغۇر تەتقىقاتى» ژۇرنىلىنىڭ تونۇلغان فولكلورشۇناس راھىلە داۋۇتقا مەخسۇس بېغىشلانغان سانى. 2020-يىلى يانۋار.
uygurarastirmalari.com

تۈركىيەدە چىقىۋاتقان «خەلقئارا ئۇيغۇر تەتقىقاتى» ژۇرنىلىنىڭ تونۇلغان فولكلورشۇناس راھىلە داۋۇت مەخسۇس سانى ئوقۇرمەنلىرى بىلەن يۈز كۆرۈشتى. بۇ ساندا «پروفېسسور دوكتور راھىلە داۋۇتنىڭ قىزىدىن كەلگەن خەت» ماۋزۇلۇق ماقالە، ۋە ئۇنىڭ 2001-يىلى ئۈرۈمچىدە نەشر قىلىنغان «ئۇيغۇر مازارلىرى» ناملىق كىتابى تونۇشتۇرۇلغان. ژۇرنالنىڭ ئاخىرىدا راھىلە داۋۇتنىڭ دۇنيانىڭ ھەرقايسى جايلىرىدىكى كەسىپداشلىرى بىلەن چۈشكەن فوتو-سۈرەتلىرىگە ئورۇن بېرىلگەن. مەزكۇر ژۇرنالدا يەنە ئۇيغۇر تىلى، ئەدەبىياتى، تارىخى، فولكلورى ۋە تۈركىي مىللەتلەر بىلەن مۇناسىۋەتلىك 17 پارچە ماقالە، كىتاب باھالاش ۋە تونۇشتۇرۇش بىلەن مۇناسىۋەتلىك 2 پارچە ماقالە يەر ئالغان بولۇپ، تۈركىيە ۋە دۇنيانىڭ ھەرقايسى جايلىرىدىكى ئۇيغۇرشۇناسلارنىڭ يېقىنقى مەزگىلدىكى تەتقىقات نەتىجىلىرى ئوتتۇرىغا قويۇلغان.

ژۇرنالدا ئادىلجان ئەرۇيغۇرنىڭ «خىتاي تىلىنىڭ ئۇيغۇر تىلىغا بولغان تەسىرى»، ئىستانبۇل ئۇنىۋېرسىتېتى دوكتورانتى ماھىرە ئوسماننىڭ «ھازىرقى زامان ئۇيغۇر تىلىدا كىشىلەرنىڭ ئورگان ئىسىملىرى بىلەن ياسالغان ماقال-تەمسىللەر»، دوكتور نەبىجان تۇرسۇننىڭ «1933-ۋە 1944-يىللىرى قۇرۇلغان شەرقىي تۈركىستان جۇمھۇرىيەتلىرى توغرىسىدا تارىخىي مەنبەلەر ۋە ئۇلارنىڭ قىممىتى»، ئۇيغۇرشۇناس تىموتي گروس ئەپەندىنىڭ «يەتتە قىز مازىرى: پىچاندىكى بىر زىيارەتگاھ ھەققىدە» ماۋزۇلۇق ماقالىلىرىدىن بولۇپ 17 پارچە ئەسەرگە ئورۇن بېرىلگەن.

بىز ماقالىسى ھەققىدە مەلۇمات ئىگىلەش ئۈچۈن كونيا سەلچۇق ئۇنىۋېرسىتېتى دوكتورانتى ئادىل ئەرۇيغۇر ئەپەندى بىلەن تېلېفون سۆھبىتى ئېلىپ باردۇق. ئۇ، «خىتاي تىلىنىڭ ئۇيغۇر تىلىغا بولغان تەسىرى» ناملىق ماقالىسىدە خىتايچىنىڭ ئۇيغۇرچىغا بولغان تەسىرىنىڭ تەبىئىي يوللاردىن بەكرەك مەجبۇرىي ۋاسىتىلەر ئارقىلىق بولغانلىقى ئوتتۇرىغا قويغانلىقىنى بايان قىلدى.

ھازىر شىۋېتسىيەدە تۇرۇۋاتقان ئۇيغۇر زىيالىيسى زۇلھايات ئۆتكۈز خانىم بۇ ساندا ئېلان قىلىنغان «شەرقىي تۈركىستاندا بېلىق ۋە بېلىقچىلىق» ماۋزۇلۇق ماقالىسى توغرىسىدا مەلۇمات بەردى.

ژۇرنالدىكى باشقا ماقالىلەردىمۇ ئۇيغۇر تىلى، ئەدەبىياتى، تارىخى ۋە فولكلورى ئۈستىدىكى تەتقىقاتلاردا قولغا كەلتۈرۈلگەن يېڭى نەتىجىلەر ئوتتۇرىغا قويۇلغان.

ژۇرنالنىڭ راھىلە داۋۇت مەخسۇس سانىنى چىقىرىشنىڭ ئەھمىيىتى نېمە؟ بۇ ژۇرنالنىڭ ئۇيغۇر تەتقىقاتىدىكى رولى نېمە؟ بۇ ھەقتە ئىزمىردىكى ئېگە ئۇنىۋېرسىتېتى تۈرك دۇنياسى تەتقىقات ئىنستىتۇتىنىڭ پروفېسسورى مەزكۇر ژۇرنالنىڭ خوجايىنى ئالىمجان ئىنايەت ئەپەندى زىيارىتىمىزنى قوبۇل قىلدى. ئۇ، ئالدى بىلەن بۇ ساننى چىقىرىشقا كۈچ چىقارغان زىيالىيلارغا رەھمەت ئېيتتى.

پروفېسسور ئالىمجان ئىنايەت ئەپەندى، بۇ ساننى 3 يىلدىن بۇيان ئىز-دېرىكى يوق، تونۇلغان فولكلورشۇناس راھىلە داۋۇتقا بېغىشلاشنىڭ جازا لاگېرلىرى ۋە تۈرمىلەردە يېتىۋاتقان بىگۇناھ ئۇيغۇر زىيالىيلىرىنى ئەسلەش ۋە ئۇلارنى قوللاش ئىكەنلىكىنى بايان قىلدى.

ئۇيغۇر مەسىلىسىنىڭ خەلقئارالىشىشىغا ئەگىشىپ ئۇيغۇر تەتقىقاتىمۇ كۈنسايىن كۈچەيمەكتە. ئادىل ئەرۇيغۇر ئەپەندى بۇنداق بىر پەيتتە تۈركىيەدە بۇنداق باي مەزمۇنغا ئىگە ئىلمىي ژۇرنالنىڭ چىقىشى ئۇيغۇر تەتقىقاتىدىكى بوشلۇقنى تولدۇرغانلىقىنى بايان قىلدى.

زۇلھايات ئۆتكۈر خانىم «خەلقئارا ئۇيغۇر تەتقىقاتى» ژۇرنىلىنىڭ راھىلە داۋۇتقا ئاتاپ چىقىرىلىشىنىڭ زور ئەھمىيەتكە ئىگە ئىكەنلىكىنى، چۈنكى راھىلە داۋۇت خانىمدەك سىمۋوللۇق ئىسىملار ئارقىلىق دۇنيادىكى ئۇيغۇرشۇناسلارنىڭ دىققىتىنى ئۇيغۇرلارنىڭ ھازىرقى ئېغىر ۋەزىيىتىگە تارتقىلى بولىدىغانلىقىنى بايان قىلدى.

«خەلقئارا ئۇيغۇر تەتقىقاتى ژۇرنىلى» 7 يىلدىن بۇيان ئۇيغۇر ۋە تۈرك تىللىرىدا ئىزچىل ھالدا نەشر قىلىنماقتا. ھازىرغىچە ئوقۇرمەنلىرى بىلەن يۈز كۆرۈشكەن 16 ساندا 240 پارچە ماقالە ئېلان قىلىنغان.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت