Mehkum zahire hijablinishni kéchikip toxtatqanliqi, gülbostan “Jinayiti” ni iqrar qilmighanliqi üchün 15 we 17 yilliqtin késiwétilgen

Muxbirimiz shöhret hoshur
2022-01-26
Share
Mehkum zahire hijablinishni kéchikip toxtatqanliqi, gülbostan “Jinayiti” ni iqrar qilmighanliqi üchün 15 we 17 yilliqtin késiwétilgen Korladiki éghir jaza késilgen, sanji ayallar türmisining 5-etritide jazasini ötewatqan, 15 yilliq késilgen zahire memet(solda) we jaza mudditi melum bolmighan kélin zöhregül xudaberdi.
Oqurmen teminligen

Korladiki bir a'ilidin besh ayalgha éghir jaza kesken sot hökümide shu yili 38 yashliq zahire memetke 15 yilliq, 30 yashliq gülbostan ibrahimgha 17 yilliq qamaq jazasi bérilgenliki qeyt qilin'ghan. Hökümnamide zahirening eng éghir jinayi pakiti süpitide uning 2010- we 2015-yilliri arisida “Hijablan'ghanliqi we hijabini waqtida éliwetmigenliki” tilgha élin'ghan bolsa, gülbostan ibrahimning “Öyide tebligh ötküzgenlikini iqrar qilmighanliqi” tilgha élin'ghan. Muxbirimizning téléfon ziyaretliri dawamida zahire memetning sanji ayallar türmisidiki 5-etrette jaza mudditini ötewatqanliqi delillendi.

Korla sheherlik xelq sot mehkimisining 2019-yili 4-ayning 2-küni chiqarghan mezkur hökümnamiside, 1981-yili tughulghan zahire memetke 15 yilliq, 1988-yili tughulghan gülbostan yeni bostan ibrahimgha 17 yilliq qamaq jazasi bérilgenliki qeyt qilin'ghan. Hökümnamide bostan ibrahimning öz ismini gülbostan'gha özgertkenliki eskertilgen. Hökümnamide yene zahire memetning 2010- we 2015-yilliri arisida hijablan'ghanliqi, bu mezgilde tewelikidiki xadimlar hijaplanmasliq heqqide köp qétim tenqid-terbiye bergen bolsimu, qobul qilmighanliqi uning eng éghir qilmishi süpitide köp qétim tekitlen'gen. Bu bayanlardin u tutqun qilin'ghan 2018-yili uning hijablinishtin waz kechkinige üch yil bolghanliqi, jazaning aliqachan tüzitilip bolghan bir “Xataliq” üchün bérilgenliki melum. Hökümnamide gülbostanning “Öyide tebligh ötküzgenlikini iqrar qilmighanliqi”, bu ehwalni bashqilarning pash qilghanliqini uning eng éghir gunahiy süpitide tekitlen'gen.

Biz bu ikki mehkumning nede jaza mudditini ötewatqanliqi we nöwettiki ehwalini éniqlash üchün korladiki sot we teptish mehkimilirige téléfon qilduq. Xadimlardin beziliri ehwaldin xewersizlikini bildürse, bezliri xewiri bar bolsimu, lékin jawab bérelmeydighanliqini bildürdi.

Hökümnamide zahirening 2013-yili “Tebligh anglighan” we “Teblighqe sorun hazirlap bergenliki”, 2015-yili “Pilandin artuq bir perzent kögenliki” mu, uning atalmish “Jinayi qilmish” liri süpitide tilgha élin'ghan. Uning hamilidar mezgilde hamileni chüshürüwetmesliki “Xurapatliqqa tayinip dölet qanunigha tosqunluq qilish” dep eyiblen'gen. Hökümnamide gülbostanning “Tebligh anglighanliqi” we “Teblighqe sorun hazirlap bergenliki” din bashqa qilmishi tilgha élinmighan, emma uning öyide tebligh ötküzgenlikini bashqilar pash qilghanliqi, özining “Iqrar qilmighanliqi” eng éghir gunahi süpitide tekitlen'gen.

Korladiki besh mehkum ayal heqqidiki bir yürüsh xewerlrimiz bérilgendin kéyin, türkiyediki muhajirlardin biri, bu xewerlerge inkas yézip, özining bu a'ile bilen ilgiri qoshna ikenlikini bayan qildi. Téléfonimizni qobul qilghan yüsüp firdewsi isimlik bu inkaschi, mezkur a'ilining normal bir Uyghur a'ilisi ikenliki, a'ilidiki héchbir ezaning jem'iyetke ziyanliq héchqandaq qilmishi yoqluqini bayan qildi.

Sanji ayallar türmisidiki bir mes'ul xadim, zahire memet we gülbostan heqqidiki so'allirimizgha jawab bérishni ret qildi. Aldinqi küni téléfonimizni qobul qilghan bir xadim, biz teminligen kimlik nomurigha asasen, bu türmide zahire memet dep bir mehbusning barliqini ashkarilighan idi. U yene zahire memetning bu 41 yashlarda ikenliki we jaza mudditining 15 yilliq ikenlikinimu delilligen idi. Mezkur xadim bostan ibrahim heqqide arxipni tekshürüwatqan waqtida, yene bir xadim téléfonni qolgha élip, bu heqtiki uchurlarni ashkarilashqa bolmaydighanliqi, buning bir “Dölet mexpiyetliki” ikenlikini tekitlidi. Bashqa xadimlarmu bu heqtiki so'allirimizni yuqiriqigha oxshash shekilde ret qildi.

Korlada 2017-yili qur'an we jaynamazlarni yighiwélish dolquni qozghalghan, shu chaghda korlaning qarayulghuz yézisidin téléfonimizni qobul qilghan bir xadim, diniy ibadet jehettin ilgiri yol qoyulghan bezi ishlarning “Dölet bixeterlikige xewp yetküzgenliki”, shunga u pa'aliyetlerning emdilikte chekliniwatqan we jazaliniwatqanliqini ilgiri sürgen idi. U siyasettiki bu turaqsizliq sewebidin, ahalilerning diniy étiqadlirigha alaqidar némini qilish we némini qilmasliqnimu angqiralmaywatqanliqini ashkarilighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet