Roshen abbas xanim piragada jaza lagérliri mesilisi toghrisida doklat berdi

“Uyghur herikiti” teshkilatining diréktori roshen abbas xanim chéx jumhuriyitining piraga shehiridiki amérika elchisi sitéfén king ependi bilen. 2019-Yili 29-may.

Amérikadiki “Uyghur herikiti” teshkilatining diréktori roshen abbas xanim amérika tashqi ishlar ministirliqining orunlashturushi bilen 28-may awstriyening paytexti wiyénna shehiridiki “Amérika medeniyet sariyi” da jaza lagérliri toghrisida doklat bergenidi. 29-May u chéx jumhuriyitining piraga shehirige yétip kélip amérika elchixanisining sahibxaniliqida teshkillen'gen yene bir yighinda Uyghurlar we uning nöwettiki weziyiti toghrisida nutuq sözligen.

Jaza lagérliri mesilisi otturigha chiqqandin buyan “Washin'gton pochtisi géziti”, “Eljezire” qatarliq dunyaning her qaysi elliridiki köpligen meshhur axbarat wasitilirining ziyaritini qobul qilip “Sherqiy türkistanning nöwettiki weziyiti toghrisi” da melumat bérip kéliwatqan roshen abbas xanim 30-may chéx jumhuriyitining paytexti piraga shehirige yétip kelgen hamanla axbarat sahesining jiddiy ziyaret obyéktigha aylan'ghan. U bu sheherdiki gézit, radi'o, téléwiziye qatarliq axbarat wasitilirining ziyaritini qobul qilip, xitayning sherqiy türkistanda tesis qilghan jaza lagérliri mesilisini tepsiliy anglatqan.

Piraga shehiridin ziyaritimizni qobul qilghan roshen abbas xanimning bildürüshiche, u 30-may chüshtin burun amérika elchixanisi teshkilligen hersahe ilim ademliri, siyasiyonlarning yumilaq üstel yighinigha qatniship, bu yépiq yighinda jaza lagérliri toghrisida tepsiliy melumat bergen. 

Roshen abbas xanim 30-may yene piraga shehiride “Uyghurlar toghrisida munazire: xitaydiki jaza lagérliri” témisida kech sa'et 18:00 din 20:00 giche dawam qilghan bir ochuq yighinda doklat bérishke teklip qilin'ghan. Yighin'gha piraga shehiridiki siyasetchiler, kishilik hoquq pa'aliyetchiliri, aliy mektep oqughuchiliri, Uyghurlar mesilisige qiziqquchi awam xelq we axbarat sahesining xadimliri bolup köp sanda kishi qatnashqan. U yighinda qilghan sözide jaza lagérliri mesilisini nuqtiliq otturigha qoyup, dunya jama'itining Uyghurlargha ige chiqishini muraji'et qilghan. 

Piragada ötküzülgen bu yighin'gha myunxén shehiride yashawatqan nurexmet ependimu bérip qatnashqan. U bu yighinning bes-munazire bilen qizghin keypiyat ichide dawam qilghanliqini, yighinning özide chongqur tesirat qaldurghanliqini tilgha aldi. 

Amérika elchixanisining sahipxanliqi bilen awstriye, chéx jumhuriyitide uyushturulghan bu yighinlar 4 kün dawam qilghan bolup, pa'aliyet küntertipige asaslan'ghanda roshen abbas xanim 30-may bir kün ichide piragada etigen sa'et 8:00 din kech sa'et 20:00 giche oxshimighan orunlarda ötküzülgen 5 yighin'gha qatniship nutuq sözligen. Kech sa'et 22:00-23:00 giche chéxiyening t b ch téléwiziye qanilining ziyaritini qobul qilghan. 

Roshen abbas xanimning 31-may küni piragada yene 3 yerde pa'aliyiti bolup, buning biri bügün kech amérikining piragadiki elchixanisida ötküzülidighan yépiq yighin iken.