Rushen abbas xanim "Erkinlik jengchisi mukapati" gha érishti

Muxbirimiz irade
2019-04-10
Élxet
Pikir
Share
Print
Uyghur pa'aliyetchisi rushen abbas xanim "Népal 24 sa'et" namliq axbarat orginining bu yilliq "Erkinlik jengchisi" mukapatini tapshurup aldi. 2019-Yili 9-aprél.
Uyghur pa'aliyetchisi rushen abbas xanim "Népal 24 sa'et" namliq axbarat orginining bu yilliq "Erkinlik jengchisi" mukapatini tapshurup aldi. 2019-Yili 9-aprél.
RFA

"Népal 24 sa'et" namliq axbarat orgini amérikaning kaliforniye shtatida qurulghan we népal qatarliq jenubiy asiya döletliride erkin axbaratchiliqni ilgiri sürüsh meqsiti bilen qurulghan bir organ. Bu organ her yili bir qétim kishilik hoquq, kishilik erkinlik we axbarat erkinliki yolida tirishqan we bu yolda töhpe yaratqan kishilerni tallap "Erkinlik jengchisi" mukapati bilen mukapatlap kéliwatqan bolup, bu mukapat bu yil Uyghur pa'aliyetchisi rushen abbas xanimgha bérildi.

Rushen abbas xanim 9-aprél küni amérika dölet mejlisidiki guwahliq bérish yighinini ayaghlashturupla kaliforniye shtatida ötküzülgen bu mukapat tarqitish murasimigha yürüp ketken idi. U pa'aliyette Uyghurlarning nöwette yoluquwatqan éghir weziyiti heqqide doklat bergen we mukapat tapshurup alghan. U bügün radiyomizning ziyaritini qobul qilghanda mezkur organning özige bu mukapatni bérishige özining Uyghurlarning kishilik hoquqi üchün qilghan pa'aliyetliri we shundaqla Uyghurlarning nöwettiki jiddiy weziyitige bolghan hésdashliq seweb bolghanliqini bildürdi.

Rushen abbas xanimning éytishiche, yuqiridiki bu organ bu mukapat arqiliq özining pa'aliyetliri seweblik tutqun qilin'ghan hedisi gülshen xanimgha we pütkül Uyghurlargha bolghan hésdashliqini ipadileshnimu meqset qilghan. Rushen xanim buning özige nisbeten zor righbetlendürüsh bolghanliqini éytti.

9-Aprél échilghan "Erkinlik jengchisi" mukapatlash murasimigha kaliforniyediki Uyghur ziyaliyliridin erkin sidiq ependi bashchiliqidiki ondin artuq Uyghurmu qatnashqan. Erkin sidiq ependi bügün radiyomiz ziyaritini qobul qilip, bu pa'aliyetning Uyghur mesilisini amérikadiki oxshimighan qatlam yaki jama'etlerge tonutush üchün paydiliq sorun'gha aylandurulghanliqini éytti.

Rushen abbas xanimmu bu pa'aliyette yerlik hökümetlerning wekilliri barliqini, bu mesilining washin'gtondiki siyaset sahesidin chiqip, yerlik da'irige kéngiyishining Uyghurlar heqqidiki ikki qanun layihesining maqullinishi üchün muhimliqini bildürdi.

Erkin sidiq ependimu sözide Uyghur millitining mewjutluqi intayin éghir xewp astida qalghanliqini, lagérlardiki Uyghurlarning türküm-türkümlep xitayning ichkiri ölkilirige yötkiliwatqanliqidek xewerler chiqiwatqan bir shara'itta Uyghurlarning pütün küchini merkezleshtürüp öz siyasiy dewasini kücheytishi zörürlükini tekitlidi.

Toluq bet