Сабиқ мәһбус мәмәттурсун осман: «қейин-қистақтин қутулуш үчүн өзүмни ‹җиһатчи' дәп иқрар қилдим»

Мухбиримиз шөһрәт һошур
2019-07-01
Елхәт
Пикир
Share
Принт
Әзһәрдики әснәм уйғур ашханисиниң ашпизи мәмәттурсун осман әпәнди.
Әзһәрдики әснәм уйғур ашханисиниң ашпизи мәмәттурсун осман әпәнди.
RFA/Shöhret Hoshur

2016- Вә 2017-йиллири мисирдин қайтқан вә қайтурулған уйғурлар арисида әзһәрдики әснәм уйғур ашханисиниң ашпизи мәмәттурсун османму бар болуп, у 2017‏-йили хотәндә тутқун қилинған. У қамақта мисирдики һаяти һәққидә қаттиқ соал-сораққа вә еғир қейин-қистаққа учриған. У гәрчә мисирда 6 айчә ашпәзлик қилған, униңдин башқа һечқандақ паалийәткә қатнашмиған болсиму, әмма сорақ җәрянда өзиниң җиһад һәққидә тәблиғ аңлиғанлиқи вә хотәнгә вәзипә билән қайтқанлиқи һәққидики иқрарнамигә қол қоюшқа мәҗбурланған. Төвәндә бу җәрянни сабиқ мәһбус мәмәт турсун османниң өз еғизидин аңлайсиләр.

Хитай қамақханисидин өзиниң һаятини қутқузуш вә қамақханидики әһвалларни дуняға ашкарилаш үчүн хитайниң чәтәлдә туруп җасуслуқ қилиш тәклипини қобул қилған һәмдә өткән йили хитай сақчилири тәрипидин дубәйгә йолға селинған. Дубәйгә барғандин кейин һәқиқий әһвални дадисиға ашкарилап, хитай билән чәк-чегрисини айриған сабиқ мәһбус мәмәттурсун осман сөһбитимизниң бүгүнки қисмида өзиниң хотән қамақханисидики мәзгилдә дуч кәлгән соал-сорақ вә қейин-қистақлири һәққидә тохталди.

Униң дейишичә, сақчилар уни алди билән «мисирда дин оқуғанлиқи» ни иқрар қилишқа мәҗбурлиған. У буни инкар қилғандин кейин «мисирда диний тәблиғ аңлиғанлиқи» ни иқрар қилишқа қисталған. У сақчиларниң пәйли вә камирдашлириниң кәчүрмишилиригә асасән сорақта сақчилар күткән җавабни бәрмигүчә қейин-қистақниң түгимәйдиғанлиқи вә бу қамақханида җисманий җәһәттин түгишидиғанлиқини пәрәз қилған. Шуңа ахири сақчилар еғизиға селип бәргән җавабларни тәкрарлашқа, йәни аталмиш «җинайити» ни иқрар қилишқа мәҗбур болған.

Мәмәттурсун османниң дейишичә, бу қамақханидики барлиқ тутқунлар дуч кәлгән әһвал болуп, тутқунлар өзлири өткүзмигән, әксичә сақчилар лайиһәләп чиққан бир җинайәт хатирисигә қол қоюш вә бу аталмиш «җинайити» гә чәтәлдә яшаватқан бирлирини шерик қилип көрситиш арқилиқ қейин-қистақтин қутулған. Мисирдики һаятида қазан беши билән ятиқи арисидин нериға беришқа вақти йәтмигән мәмәттурсун осман өзиниң җиһадқа алақидар тәблиғ аңлиғанлиқи һәққидики иқрарнамигә қол қойған. Гәрчә у хотәнгә дадисиниң тосушиға қаримай юртини сеғинип қайтип кәлгән болсиму, әмма өзиниң хотәнгә аталмиш «террорчилар тапшурған вәзипә» билән киргәнликини иқрар қилған. Йәни у хотәнгә чәтәлдә дин оқушни халайдиғанларни тепиш вә йолға селиш үчүн кәлгәнликини баян қилған.

Юқирида мисирдин қайтип тутқун қилинған уйғурлардин ашпәз мәмәттурсун османниң хотән қамақханисида баштин кәчүргән соал-сорақ вә қейин-қистақлири һәққидә мәлумат бәрдуқ.

Пикирләр (0)
Share
Толуқ бәт