Ғулҗидики 40 йиллиқ маарипчи саҗидә рәһимҗан 20 йиллиқ кесиветилгән

Ихтиярий мухбиримиз әкрәм
2021-01-07
Share
Ғулҗидики 40 йиллиқ маарипчи саҗидә рәһимҗан 20 йиллиқ кесиветилгән 2018-Йилидин буян из-дерики болмиған, 20 йиллиқ қамақ җазасиға мәһкум қилинған саҗидә рәһимҗан. (Вақти вә орни ениқ әмәс)
Photo: RFA

20 Йиллиқ қамақ җазасиға мәһкум қилинған саҗидә рәһимҗанниң 2018-йилидин буян из-дерики болмиған.

1963-Йили 13-март ғулҗа шәһиридә дуняға кәлгән саҗидә рәһимҗанниң 40 йиллиқ һаяти маарип саһәсидә хизмәт қилиш билән өткән. У ахирқи 20 йилда ғулҗа шәһәрлик 16-башланғуч мәктәпниң мудири һәмдә ғулҗидики уйғур сахавәтчи байлиридин нуртай һаҗим қурған йетим-йесирлар мәктипиниң мудири болуп хизмәт қилған. 2018-Йили яз айлирида туюқсиз ғайиб болған.

Һазир голландийәниң роттердам шәһиридә яшаватқан саҗидә рәһимҗанниң оғли атабекниң билдүрүшичә, униң аписи билән ахирқи қетим телефон арқилиқ көрүшкән вақти 2018-йили 4-айда болған. Шундин кейин аписи вә уруқ-туғқанлиридин һечқандақ учур алалмиған.

Роттердам шәһиридә яшаватқан атабекниң саяһәт вә такси ширкити болуп, у аилисидикиләрдин учур алалмиғандин кейин, 2019-йили язда өзиниң саяһәт ширкитигә херидар болған бир хитай кишигә пул берип, уни ғулҗиға берип әһвал игиләп келишкә әвәткән. Бирақ бу хитай саҗидә рәһимҗанниң 2018-йили язда тутуп кетилип, шу йили 12-айларда 20 йиллиқ кесиветилгәнликидин башқа бир мәлуматқа еришәлмигән. Саҗидә рәһимҗанниң қайси түрмигә соланғанлиқи, немә үчүн 20 йиллиқ кесиветилгәнлики, башқа туғқанлириниң әһвали тоғрисидиму һечқандақ учурға еришәлмигән.

Атабек кейинчә нуртай һаҗим мәктипидики оқутқучиларниң мутләқ көп қисминиң 15 йилдин 25 йилғичә болған еғир қамақ җазалириға мәһкум қилинғанлиқини тордики учурлардин көргән. Бирақ сәвәбини билмигән. Радийомиз мухбирлири болса "нуртай һаҗим искәндәр мәктипи" ниң 2018-йили әтиязда тақилип кәткәнликини, нуртай һаҗим башлиқ бир бөлүк даңлиқ тиҗарәтчиләрниң шу йили язғичә болған арилиқта қолға елинип болғанлиқини ениқлиғаниди.

Атабекниң баян қилишичә, аписи саҗидә рәһимҗан 2015-йили 11-айда 3 айлиқ саяһәт билән оғлини йоқлаш үчүн голландийәгә кәлгән болуп, униң 20 йиллиқ қамақ җазасиға йолуқушиға мушу чәт´әл саяһити асаслиқ сәвәб болған болуши мумкин икән.

Һазирға қәдәр ашкариланған мәлуматлар хитайниң җаза лагерлирини тәсис қилип тунҗи йоқитиш нишаниға алған кишиләрниң бешида маарип, мәдәнийәт, сән´әт, тиҗарәт, дин саһәлиридә хизмәт қилған вә көзгә көрүнгән кишиләр болғанлиқини испатлимақта. 40 Йиллиқ һаятини пәрзәнт тәрбийәләш вә йетим-йесирларниң бешини силаш билән өткүзгән саҗидә рәһимҗанму шу милйонлиған қурбанларниң биригә айлинип кәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт