Ghuljidiki 40 yilliq ma'aripchi sajide rehimjan 20 yilliq késiwétilgen

Ixtiyariy muxbirimiz ekrem
2021-01-07
Share
Ghuljidiki 40 yilliq ma'aripchi sajide rehimjan 20 yilliq késiwétilgen 2018-Yilidin buyan iz-dériki bolmighan, 20 yilliq qamaq jazasigha mehkum qilin'ghan sajide rehimjan. (Waqti we orni éniq emes)
Photo: RFA

20 Yilliq qamaq jazasigha mehkum qilin'ghan sajide rehimjanning 2018-yilidin buyan iz-dériki bolmighan.

1963-Yili 13-mart ghulja shehiride dunyagha kelgen sajide rehimjanning 40 yilliq hayati ma'arip saheside xizmet qilish bilen ötken. U axirqi 20 yilda ghulja sheherlik 16-bashlan'ghuch mektepning mudiri hemde ghuljidiki Uyghur saxawetchi bayliridin nurtay hajim qurghan yétim-yésirlar mektipining mudiri bolup xizmet qilghan. 2018-Yili yaz aylirida tuyuqsiz ghayib bolghan.

Hazir gollandiyening rottérdam shehiride yashawatqan sajide rehimjanning oghli atabékning bildürüshiche, uning apisi bilen axirqi qétim téléfon arqiliq körüshken waqti 2018-yili 4-ayda bolghan. Shundin kéyin apisi we uruq-tughqanliridin héchqandaq uchur alalmighan.

Rottérdam shehiride yashawatqan atabékning sayahet we taksi shirkiti bolup, u a'ilisidikilerdin uchur alalmighandin kéyin, 2019-yili yazda özining sayahet shirkitige xéridar bolghan bir xitay kishige pul bérip, uni ghuljigha bérip ehwal igilep kélishke ewetken. Biraq bu xitay sajide rehimjanning 2018-yili yazda tutup kétilip, shu yili 12-aylarda 20 yilliq késiwétilgenlikidin bashqa bir melumatqa érishelmigen. Sajide rehimjanning qaysi türmige solan'ghanliqi, néme üchün 20 yilliq késiwétilgenliki, bashqa tughqanlirining ehwali toghrisidimu héchqandaq uchurgha érishelmigen.

Atabék kéyinche nurtay hajim mektipidiki oqutquchilarning mutleq köp qismining 15 yildin 25 yilghiche bolghan éghir qamaq jazalirigha mehkum qilin'ghanliqini tordiki uchurlardin körgen. Biraq sewebini bilmigen. Radiyomiz muxbirliri bolsa "Nurtay hajim iskender mektipi" ning 2018-yili etiyazda taqilip ketkenlikini, nurtay hajim bashliq bir bölük dangliq tijaretchilerning shu yili yazghiche bolghan ariliqta qolgha élinip bolghanliqini éniqlighanidi.

Atabékning bayan qilishiche, apisi sajide rehimjan 2015-yili 11-ayda 3 ayliq sayahet bilen oghlini yoqlash üchün gollandiyege kelgen bolup, uning 20 yilliq qamaq jazasigha yoluqushigha mushu chet´el sayahiti asasliq seweb bolghan bolushi mumkin iken.

Hazirgha qeder ashkarilan'ghan melumatlar xitayning jaza lagérlirini tesis qilip tunji yoqitish nishanigha alghan kishilerning béshida ma'arip, medeniyet, sen´et, tijaret, din saheliride xizmet qilghan we közge körün'gen kishiler bolghanliqini ispatlimaqta. 40 Yilliq hayatini perzent terbiyelesh we yétim-yésirlarning béshini silash bilen ötküzgen sajide rehimjanmu shu milyonlighan qurbanlarning birige aylinip ketken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet