Сам бровнбәк: “хитай һөкүмити ‛уйғурларниң әркин яшишиға йол қоюши керәк‚”
2019.10.17
Американиң хәлқаралиқ диний әркинлик алаһидә әлчиси сам бровнбәк 17-өктәбир күни әркин асия радийоси уйғур бөлүминиң зияритини қобул қилған вақтида хитай һөкүмитиниң уйғурларға қаратқан зиянкәшликини қаттиқ әйиблиди. У: “улар уйғурларниң әркин яшишиға йоқ қоюши керәк,” деди.
Алаһидә әлчи сам бровнбәк америка һөкүмитиниң бу қетимқи бирләшкән дөләтләр тәшкилати омумий йиғинида уйғур мәсилисини алаһидә көтүрүп чиқиш арқилиқ пүтүн дуняға хитай һөкүмитиниң бир милйондин артуқ уйғурни җаза лагерлириға қамиғанлиқи вә лагерға қамалмиған милйонлиған уйғурларни асас қилған йәрлик милләтләрниң вәзийитиниңму лагердин зор пәрқләнмәйдиғанлиқини билдүрүш икәнликини тәкитлиди. Әмма у бу қетимқи б д т омумий йиғини җәрянида һеч бир мусулман дөләтниң уйғур мәсилиси һәққидә сөз қилмиғанлиқидин әпсусланғанлиқини билдүрди.
У мусулман дөләтлирини уйғур мәсилисидә авазини чиқиришқа тәвсийә қилип: “тарих уларниң сүкүтигә мукапат бәрмәйду. Сүкүттә турушниң өзи мәлум бир ишниң йүз беришигә қошулуш вә йол қоюштин дерәк бериду,” деди. У йәнә “әгәр мәлум бир хата иш мәлум бир топ кишиләрниң бешиға кәлгәндә сиз сүкүттә турувалсиңиз, узун өтмәй уларму сизни бош қоювәтмәйду. Сиз уларниң етиқадиниң немә болушидин қәтийнәзәр, һәр бир инсанниң кишилик һоқуқи вә диний әркинлики үстидә чоқум еғиз ечишиңиз керәк,” деди.