Ürümchi yamaliq saqchixanisining xadimi enwer abdushükürning tutqunda ikenliki delillendi

Muxbirimiz shöhret hoshur
2022.02.22
Share on WhatsApp
Share on WhatsApp
Ürümchi yamaliq saqchixanisining xadimi enwer abdushükürning tutqunda ikenliki delillendi Saqchi xadimlirining siyasiy arqa körünüshini qaytidin omumyüzlük tekshürüshte “Mesile bayqalghan” dep tutqun qilin'ghan ürümchi saybagh rayoni yamaliq saqchixanisining xadimi enwer abdushükürdur. (Waqti we orni éniq emes)
Abdusemi Abduréhim teminligen

Melum bolushiche, 2017‏-yili Uyghur rayonida chong tutqun bashlan'ghandin kéyin, saqchi xadimlirining siyasiy arqa körünüshi qaytidin omumyüzlük bir qétim tekshürülgen. Bu tekshürüshte Uyghur saqchi xadimlirining bir qismimu “Siyasiy jehettin gumanliq” dep qarilip béshigha qara xalta kiydürülgen we késiwétilgen. Bulardin eng yéqinda ashkarilan'ghini ürümchi saybagh rayoni yamaliq saqchixanisining xadimi enwer abdushükürdur. U ene shu tekshürüshte “Mesile bayqalghan” dep tutqun qilin'ghan.

Ötken ayda yaponiyediki abdusemi abduréhim ependi, yaponiyede oqup qaytqan tutqundiki akisi abduxélil abduréhim heqqide radiyomizgha melumat bergen mezgilide, jiyeni enwer abdushükürningmu akisidin awwal tutqun qilin'ghanliqi we 7 yilliq késiwétilgenlikini melum qilghanidi. Déyilishiche, enwer abdushükürmu bir mezgil yaponiyede oqughan we yurtigha qaytqandin kéyin, oqughan kespide ish tapalmighanliqtin bir saqchixanigha ishqa chüshkeniken. Biz abdusemi teminligen yip uchlirigha asasen ürümchi saybagh rayonidiki saqchixanilargha téléfon qilduq. Xadimlarning köpinchisi xuddi ilgirikige oxshashla, so'allirimizgha jawab bérishni ret qildi.

Enwer abdushükür heqqide éniqlashlirimiz dawam qiliwatqan künlerde, muhajirettiki ürümchi weziyitidin xewerdar kishilerdin biri so'allirimizgha élxet arqiliq jawab bérip, 2017‏-yili Uyghur rayonida chong tutqun bashlan'ghandin kéyin, saqchilar üstidin omumyüzlük dégüdek siyasiy arqa körünüshini tekshürüsh élip bérilghanliqi we bu jeryanda zor bir türküm Uyghur saqchilirining tutqun qilin'ghanliqini ashkarilidi. U yene saqchi enwer abdushükürning saybagh rayondiki yamaliq saqchixanisining saqchisi ikenlikidin xewiri barliqini bildürüsh bilen birlikte, uning del shu jeryanda “Arqa körünüshidin mesile chiqip” tutqun qilin'ghanliq éhtimalliqini eskertti. Téléfonimizni qobul qilghan saybagh rayonidiki 1‏-awghust saqchixanisining xadimidin enwer abdushükürni sorighinimizda, u enwerning shinjang oniwérsitétida olturushluq ikenlikidin xewiri barliqini ashkarilash we tutqundiki saqchilar heqqide melumat bérelmeydighanliqini bildürüsh arqiliq, uning tutqunda ikenlikini wasitilik halda delillidi.

Abdusemi jiyen inisi enwer abdushükürning heqsizliqqa chidimaydighan, qéni qiziq bir yash ikenliki, shunga, 2009-yildiki ürümchi weqesidin kéyin, uni bir xapiliqqa ariliship qalmasliq üchün ata-anisining uni yaponiyege oqushqa ewetkenliki, uning yaponiyege oqushqa kélishige tutqundiki akisi abduxilil abduréhimning küch chiqarghanliqini bayan qildi.

Ötken yili Uyghur aptonom rayonluq partkom siyasiy qanun komitétining mu'awin sékrétari, yuqiri derijilik emeldar shirzat bawudun heqqide ishlen'gen xitayning bir teshwiqat filimida ili wilayetlik saqchi idarisining mu'awin bashliqi yalqun dégen kishining misirda oqughan oghli bilen oxshash waqitta késiwétilgenliki bayan qilin'ghan. Shu chaghda muhajirettiki Uyghurlar arisida yalqunning balisini misirgha oqushqa ewetkenliki üchün 2017‏-yilining béshida tutqun qilin'ghanliqi heqqide gheyriy-resmiy xewerler tarqalghanidi.

Téléfonimizni qobul qilghan ürümchi saybagh rayoni yamaliq saqchixanisining bir xadimimu, enwer abdushürkürning ilgiri mushu saqchixanida ishligenliki, saqchilarning “Siyasiy arqa körünüshi” tekshürülgende uning tekshürüshtin ötelmey qalghanliqini ashkarilidi. U shu tekshürüshtin kéyin enwer abdushükürning ishtin toxtitilghanliqi we ornigha yéngidin 3 xadimning qobul qilinip ishqa chüshkenlikini tilgha aldi.

Abdusemi, enwer abdushükürning 2021-yili 4-yaki 5-aylarda tutulghanliq éhtimalliqini bayan qilghanidi. Mezkur saqchi xadimi enwer abdushükürning 2020-yilining axiri we 2021-yilining bashliri arisida tutulghanliqini bildürdi.

Melum bolushiche, enwer abdushükürdin “Mesile” chiqqandin chiqqandin kéyin, u tutqun qilin'ghan bolsimu, emma uning délosining tepsilati, yeni atalmish “Gunahi” ning néme ikenliki heqqide uning xizmetdashlirighimu, hetta a'ile tawabi'atighimu melumat bermigen.

Abdusemi abduréhim enwer abdushükürning 7 yilliq késilgenlikidin éniq xewer tapqanliqini bildürgen bolsimu, emma uning jaza mudditini nede ötewatqanliqidin hazirghiche xewiri yoqlighini éytti. Ürümchi yamaliq saqchixana xadimlirimu, uning délosining tepsilati heqqide melumat bérilmidi.

Ilgiriki éniqlashlirimizda ürümchi atbeyge saqchixanisining mu'awin bashliqi nurmemet yüsüpning tutqun qilinip soraqta ölgenliki we yéngisarda bir türküm saqchi xadimlirining a'ile ezaliridin “Mesile” chiqqanliqi üchün tughqanliri bilen birlikte tutqun qilin'ghanliqi melum bolghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet