Ghayip doxtur seyyare nijat ürümchi sheherlik 3‏-qamaqxanidin ösmürler türmisige yötkelgen

Muxbirimiz shöhret hoshur
2021.05.24
Seyyare nijatning saqchilargha “Maslashmighanliqi” üchün 4 yildin buyan délosining xulasisi chiqmighanliqi melum Ürümchi dostluq doxturxanisining doxturi seyyare nijat xanim. (Waqti we orni éniq emes)
Nadire Nijat teminligen

Doxtur seyyare nijat qamaqxanidin ösmürler türmisige yötkelgen 4 yildin buyan iz-dériki bolmighan we chet eldiki uruq-tughqanliri süzüshte qilghandin kéyin ürümchi sheherlik 3‏-qamaqxanida ikenliki a'ilisige bildürülgen.

Ghayib doxtur seyyare nijatning a'ilisi bu yil 7-may küni saqchilardin uning ösmürler türmisige yötkelgenlikini uqqan. Bu heqte pikir bayan qilghan shwétsiyediki sabiq saqchi xadimi yolwas ependi seyyarening késilip bolghanliq éhtimalliqini, peqet xelq'ara jama'et pikrining bésimigha jawabenla uning türmige yötkelgenlikining bildürülgenlikini ilgiri sürdi.

Hörmetlik radiyo anglighuchilar, ghayib doxtur seyyare nijatning hayat yaki hayat emesliki a'ili'e ezalirigha melum bolmay turuwatqan bu külerde, yeni mushu ayning 7 ‏-küni uning ghuljadiki dadisi nijat abduréhimgha qizi seyyarening ösmürler türmisige yötkelgenliki uqturulghan. Bu uchur nijat abduréhimning türkiyediki chong qizi nadire nijat arqiliq seyyarning amérikadiki chong dadisi rexiy hajigha yétip kelgen. Rexiy haji seyyarening ehwalini tunji bolup dunyagha ashkarilighan. Shuningdin kéyin uning ürümchi qamaqxanisida hayat ikenliki heqqide uchur alghan kishi bolsimu, emma rexi haji da'irilerning bergen bu uchurlirigha guman bilen qarap kéliwatqan idi. Bolupmu bu yil 2-ayda saqchilar uning ata-anisigha seyyarening ürümchi sheherlik 3‏-qamaqxanida ikenlikini bildürüp turupmu, téléfonda bolsimu körüshtürmesilikige qarap, uning hayat ikenlikidin yenila guman qilip kéliwatqan idi.

Nöwette shwétsiyede yashawatqan sabiq saqchi yolwas ependi seyyare nijatning ata-anisi bu qétim tapshuruwalghan uchurgha asasen, uning atalmish “Jinayet” ining békitilip bolghanliq we késilgenlik éhtimalliqini otturigha qoydi.

Uning déyishiche, 1990-yili tughulghan, shixenze méditsina oniwérsitétini püttürgen we bir nechche yil ürümchi sheherlik 3-doxtrxanida balilar doxturi bolup ishligen seyyare nijatning ösmürler türmisige yötkilishi gheyriy normal bir ehwal iken. Emma rayonda irqiy qirghinchiliqning élip bériliwatqanliqi, shunga rayonda qanun we tertiptin söz échishning mumkin emesliki, bolupmu 3 milyondin artuq Uyghurning türme we lagérlargha solanlan'ghanliqidin ibaret nöwettiki ré'alliq közde tutulsa, uning ösmürler türmisige yötkilishining ejeblinerlik bir yéri yoq iken. Yolwas ependi yene lagérlargha solan'ghan Uyghurlarni türmilerge yötkesh arqiliq ijra'atlirining qanuniy ikenlikini xelq'ara jama'etke bildürüshke tirishiwatqan xitay da'irilirining türmide orun yétishmeslik mesilisige duch kelgenlik éhti'amlliqinimu otturigha qoydi.

Ilgiriki éniqlashlirimizda seyyare nijatning eng deslepte ürümchi dawendiki ayallar qamaqxanisida ikenliki ashkarilan'ghan, kéyinche uning ürümchi sheherlik 3‏-qamaqxanida ikenliki a'ilisige bildürülgen. Seyyarening a'ilisi bu uchurni 4 yil süküt qilish jeryanida érishken emes, peqet uning türkiyediki hedisi, amérikadiki hammisi we chong dadisi sükütini buzup ehwalni xelq'ara jama'etke ashkarilighandin kéyin andin bu xewerge érishken.

Sabiq saqchi yolwas ependi irqiy qirghinchiliq dawam qiliwatqan Uyghur rayonida uruq-tughqanlar heqqide uchur élishning axirqi we birdin-bir yolining ehwalni xelq'ara jama'etke ashkarilash ikenlikini tekitleydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.