Қағилиқта тепивелинған 3 балиниң ата-аниси лагердин өйигә қайталмиған оқутқучи икәнлики ашкариланди

Мухбиримиз шөһрәт һошур
2019-11-01
Елхәт
Пикир
Share
Принт
Қағилиқ наһийилик қатнаш сақчилири тарқатқан, өзлириниң йолда езип қалған 3 балини аилисигә тапшуруп бәргәнликини һәққидики видейолуқ хәвәр.
Қағилиқ наһийилик қатнаш сақчилири тарқатқан, өзлириниң йолда езип қалған 3 балини аилисигә тапшуруп бәргәнликини һәққидики видейолуқ хәвәр.
Social Media

Өткән һәптә қағилиқ наһийилик қатнаш сақчилири бир видейолуқ уқтуруш тарқитип, өзлириниң йолда езип қалған 3 балини аилисигә тапшуруп бәргәнликини хәвәр қилған вә ата-аниларни пәрзәнтлиригә яхши қараш һәққидә агаһландурған иди. Мухбиримизниң бу һәқтә елип барған ениқлашлири давамида бу үч балиниң ата-анисиниң қағилиқтики бир лагерда оқутқучи икәнлики ашкариланди. Мәлум болушичә, адәттә һәр һәптә ахири өйлиригә қайтидиған бу оқутқучилар өткән һәптә рухсәт берилмигәнлик сәвәбидин өйигә қайталмиған. Буниң билән мәктәптин қайтқан үч балиси кочида қелип, йолда езип қалған икән.

Һөрмәтлик радийо аңлиғучилар, өткән һәптә торларда тарқалған бир видейолуқ уқтурушта қағилиқ наһийәисидики қатнаш сақчилириниң йолда езип қалған 3 кичик балини юқири сүрәтлик йол яқисидин тепивалғанлиқи вә аилисигә тапшуруп бәргәнлики баян қилинған. Бу уқтурушта йәнә аһалиләрниң пәрзәнтлиригә обдан қарши тәвсийә қилинған иди. Уқтуруштики көрүнүштә үч кичик балиниң қорққинидин йиғлиған авази вә сақчиларниң йол яқисидин уларниң нәрсә керәклирини топлаватқан көрүнүши көрситилгән.

Биз вәқәниң арқа көрүнүшини, йәни 3 балиниң кочида қелишиниң сәвәбини ениқлап беқиш үчүн қағилиқ наһийсигә телефон қилдуқ. Вәзийәттин хәвәрдар кишиләрдин бири бу балиларниң дадисиниң әслидә наһийәлик һөкүмәтниң хизмәтчиси икәнликини, нөвәттә бир лагерда оқутқучилиқ қилидиғанлиқини мәлум қилди. Әмма телефонимизни қобул қилған қағилиқ наһийәлик һөкүмәттики хадимлар бу балиларниң кимлики вә ата-анисила әмәс, бәлки мәзкур уқтуруштинму хәвәрсизликини баян қилди.

Наһийәлик мупәттиш идарисидики бир хадимдин йолдин тепивелинған 3 балиниң лагердики оқутқучи ата-анисиниң илгири мушу идраиниң хизмәтчиси яки әмәсликини сориғинимизда у бу идарә лагерда ишләйдиған бирсиниң йоқлуқини баян қилди. Вәзийәттин хәвәрдар кишиниң баян қилишичә, бу үч балиниң ата-анисиниң лагерда хизмәт қилидиғанлиқи вә һәптидә бир қетимла өйгә қайтидиғанлиқи үчүн балилар мәктәптин адәттә һәптә ичидә чоң дадиси вә чоң аниси тәрипидин, пәқәт һәптә ахиридила ата-наиси тәрипидин өйигә еелип келинидикән. Өткән һәптә ахири лагердики уштумтут бир хизмәт җиддийлики сәвәбидин бу балиларниң ата-аниси лагердин айрилалмиған. Бу әһвалдин хәвәрсиз қалған балиларниң бова-момиси балиларни алғили мәктәпкә бармиған. Башланғуч вә йәслидә оқуйдиған бу үч бала адити бойичә 17‏-өктәбир күни кәчтә йәсли алдида топлинип, ата-анисиниң әкитишини күткән. Әмма ата-аниси кәлмигәндин кейин өйлиригә өзлири меңип қайтишқа мәҗбур болған вә йолда езип қалған. 

Вәзийәттин хәвәрдар киши бу балиларниң дадисиниң исминиң турғун икәнлики вә қағилиқтики бир лагерда ишләйдиғанлиқи, анисиниң болса бир аһалиләр районида ишләйдиғанлиқи вә нөвәттә қәшқәр шәһиридики бир лагерда оқутқучилиқ қиливатқанлиқини баян қилған. Телефонимизни қобул қилған қағилиқ наһийәлик һөкүмәттики бир хадим бу учурларниң тоғрилиқини дәлиллиди. Наһийәлик мупәттиш идарисидики йәнә бир хадим тепивелинған 3 балиниң анисиниң исминиң арзигүл икәнлики вә башқа идаридә ишләйдиғанлиқини баян қилди. 
Йәнә хадимлар вә аһалиләр тәминлигән учурлардин бу балилардин бириниң қағилиқ базар ичи 7‏-кәнт йәслисидә оқуйдиғанлиқи, бу йәслидин 3-4 километир узақлиқта уларниң дадиси ишләйдиған лагер барлиқи, балиларни дадиси алғили кәлмигәндин кейин өзлири әнә шу лагерға қарап кетиветип, йолдин езип кәткәнлики мәлум болди. 

Һөрмәтлик радийо аңлиғучилар, илгири қәшқәрдики бир лагер сақчиси лагерда ялғуз аталмиш оқуғучиларниңла әмәс, бәлки оқутқучиларниңму нәзәрбәнт астида икәнлики, уларниң лагер қоросидин халиған вақитта чиқип кетәлмәйдиғанлиқини паш қилған иди.

Пикирләр (0)
Share
Толуқ бәт