Әрәб бирләшмә хәлипиликидә ғайиб болған әхмәтҗан талипниң хитайға елип кетилгәнлики илгири сүрүлмәк

Мухбиримиз әркин
2020-02-19
Share
exmetjan-talip.jpg Хитайға елип кетилгәнлики илгири сүрүлүватқан әрәб бирләшмә хәлипиликидә ғайиб болған әхмәтҗан талип әпәнди.
Amannisa Talip teminligen

Әхмәтҗан талип 2007‏-йилдин башлап әрәб бирләшмә хәлипиликиниң дубәй шәһиридә яшап, хизмәт вә қошумчә тиҗарәт билән шуғуллинип кәлгән. 2013‏-Йили униң һаятидики муһим бурулуш нуқтиси болиду. У шу йили өзигә охшаш корлалиқ болған аманниса абдулла билән тонушуп, той қилиду. Хитайниң шәрқий-шималидики җилин университети қармиқидики бетйон теббий институтиниң сестралиқ кәспини пүттүргән аманниса шу йили дубәйгә чиқип, йолдиши билән яшайду, шундақла улар узун өтмәй бир оғул пәрзәнткә муйәссәр болиду. Кейинки 5 йиллиқ һаяти дубәйдә тирикчилик билән өткән бу аилә 2018‏-йили 2‏-айға кәлгәндә туюқсиз хитайниң 2017‏-йили башланған чоң тутқуниниң қурбаниға айлиниду. 2018‏-Йили 2‏-айниң оттурилирида дубәйдики бир сақчиханиға рәсмийәт беҗиргили барған әхмәтҗан тутқун қилинип, шу айниң ахирлирида из-дерәксиз ғайиб болиду. Униң әйни чағда 2‏-пәрзәнтигә һамилидар болуп толғақ алдида турған аяли йолдишиниң из-дерикини қилип, бармиған йери, ялвурмиған адими қалмайду. Әмма у, әхмәтҗанниң из-дерикини алалмайду. Шу мунасивәт билән биз һазир түркийәдә яшаватқан аманниса абдуллани зиярәт қилдуқ. Униң билдүрүшичә, у йеқинда һәр хил қаналлар арқилиқ әхмәтҗанниң әйни чағда корлиға елип келинип, түрмигә ташланғанлиқиға даир учур алған. Бизниң сөһбитимизниң униң қандақ тутқун қилинғанлиқи билән башланди.

Аманниса: 2018‏-йили 2‏-айниң 11‏-күниғу дәймән. Мән 2‏-айдин 11‏-күни у тутқун қилинғандин башлап, 3‏-айниң 1‏-күнигичә 10 нәччә күн кәйнидә йүрдүм. Шу чағда у гунаһсиз, дегән бир қәғәз лазим икән, шуни алғили баримән, деди. Бизму бәк гуманландуқ, ишқилип өйдикиләрниму униң алдида һели уни дәйду, һели буни дәйду, ашундақ қилип аварә қилип кәлгән. Йәни вәтәндики акисини сақчилар издәп, бәк аварә қилип, һели аву нәрсәңни әвәтип бәр, һели маву нәрсәңни әвәтип бәр, дәп нәдә туриду, немә иш қиливатиду, нәдә ишләйду, дегәндәк. Нурғун нәрсиләрни әвәтип бәргән униң алдида биз.

Мухбир: шу күни әхмәтҗан акисиға өзиниң гунаһсиз икәнликини испатлайдиған документ(һөҗҗәт) елиш үчүн сақчиға барған, шундақму?

Аманниса: сақчиға кәтти, мән изчил әнсирәп олтурдум, әмди буларниң чоқум бир яхшилиқи йоқмикин десәм, у, “мениң һечқандақ немәм болмиса униң үстигә дубәйниң сақчилири ундақ қарақосақ әмәс, яхши” деди. Ундақ болса нәгә барсиңиз барған йериңизниң орнини маңа ейтип туруң дедим. Башта шарҗаһдики бир сақчиханиға барди. Уйәрдин дубәйгә баридикәнмән, бармақ изи алидикән, деди. Бир кечә өйгә кәлмиди. Әтиси дубәйдики сақчиға бардим, оғлумни елип. Бера, дегән бир җай бар шу йәргә йеқинрақ бир сақчиханиғу дәймән. Барсақ, ришаткиниң ичидә җиқ адәмләр баркән, ашу йәрдә олтурупту йолдишим. Бизни көрүпла кәлди. Шундақ көңлүм йерим болди. У йәргә беришимни ойлап бақмиғантим. Берип немә иш болди, буниңға, дәп соридим. Сорисам, “биз билмәймиз, үстигә чиқип сора” деди ишиккә қарайдиғанлар. Үстигә чиқип соридим сорисам, “һеч иш йоқ, биз бир йәрдин хәвәр күтүватимиз” дәп маңа һечнемә дегили унимиди. “бир йәрдин хәвәр сақлаватимиз, шу хәвәр кәлсила қоюветимиз, икки күн сақла” деди. Икки күн сақлиялмаймән, мениң туғут вақтим йеқинлишип қалди, дәп ялвурдум, лекин һеч унимиди. Шуниң билән қайтип кетип әтиси йәнә кәлдим.

Мухбир: немә хәвәр сақлаватқанлиқиниму демидиму?

Аманниса: нәдин, немә хәвәр сақлаватқанлиқиниму демиди. 3 Күн сақлидуқ. Мән 3 күн тошуп әтиси әтигәндә барай, дәп баламни тәйярлаватсам йолдишим телефон қилди. “мени һазир дубәйгә сотқа елип маңидиған болди. Хитай мени җинайәтчи, тутуп бериңлар, дәп ашундақ дәпту. Шуңа булар һазир д н а тәкшүрди, қан тәкшүрди, сүйдүк тәкшүрди. Һазир сот ачидикән, сотқа баримиз. Мени йолға селиветидикән” дәп шундақ йиғламсирап гәп қилди. Уни аңлап асмандин йәргә чүшүп кәткәндәк болдум. 3 ‏-Күни хитайдин хәвәр кәптимиш. Мушундақ һазир сот ачидикән. Сотта көрүштүргили қойидикән. Сотқа барғин, кимликни, паспортни еливалғин, деди. Шуниң билән сотқа бардим. У йәрдә пүтүн ишларни чүшәндүрдуқ. . . . . . . . . . Йолдишимни чиқарди, һечқандақ бир җинайәтму ениқ әмәс икән. Һеч бир пакитму йоқ икән, һеч бир материялму йоллимапту хитай тәрәптин йолдишимға. Шуниң билән 15 күтүп тутуп туридиған болуп, һечқандақ испат йоқ қайтуривәтмәймиз, дегән ашундақ гәп болди.

Дубәй сот мәһкимисиниң 2018‏-йили 2‏-айниң 20‏-күни дубәй җинайи ишлар тәкшүрүш идариси билән бу идарә қармиқидики хәлқара тутуш буйруқи чиқирилғанлар башқармисиға әвәткән қарарида, әхмәтҗанни хитай даирилириниң тәләп қилғанлиқи илгири сүрүлгән. Лекин, хитай даирилириниң униңға даир материял билән тәминлимигәнлики, башқа бир сәвәб болмиса униң қоюп берилиши керәклики тәкитләнгән. Лекин сақчи тәрәп униң қоюп бәрмигән. Биз 19‏-феврал күни дубәй җинайи ишлар тәкшүрүш идарисиниң хәлқара тутуш буйруқи чиқирилғанлар башқармисиға телефон қилип, әхмәтҗан талипниң мәсилисини сүрүштүрдуқ. Лекин мәзкур органниң бир мәсул хадими соаллимзиға җаваб беришни рәт қилди. Униң билдүрүшичә, бу делони биз ташқи ишлар министирлиқи яки дубәй җинайи ишлар тәкшүрүш идарисигә телефон қилип соришимиз керәк икән.

Аманниса талип 2018‏-йили 2‏-айниң 20‏-күни сотқа қатнишип өйигә қайтип келиватса, йолда әхмәтҗан телефон қилип, өзиниң башқа бир қамақханиға йөткәлгәнлики, униң паспортини әкелип беришини ейтқан. Аманнисса дәрһал әхмәтҗанниң паспортини елип, бәлгиләнгән қамақханиға бариду. Униң билдүрүшичә, бу униң әхмәтҗанниң ахирқи қетим көрүши болуп қалидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт