Сәйярә ниҗатниң сақчиларға "маслашмиғанлиқи" үчүн 4 йилдин буян делосиниң хуласиси чиқмиғанлиқи мәлум

Мухбиримиз шөһрәт һошур
2021-02-11
Share
Сәйярә ниҗатниң сақчиларға Үрүмчи достлуқ дохтурханисиниң дохтури сәйярә ниҗат ханим. (Вақти вә орни ениқ әмәс)
Nadire Nijat teminligen

Үрүмчи достлуқ дохтурханисиниң ғайиб дохтури сәйярә ниҗат һәққидә илгири игилигән учурлиримизда, униң давәндики аяллар қамақханисида тутуп турулуватқанлиқи ашкариланғаниди. Мухбиримизниң йеқинқи ениқлашлирида, достлуқ дохтурханиси мәсуллириниң сәйярә ниҗатни сүрүштә қилип 2018 ‏-йили бир қетим мәзкур қамақханиға барғанлиқи вә қамақхана хадилириниң уларға, сәйярә ниҗатниң сақчиларға маслашмиғанлиқи үчүн давамлиқ тутуп турулуватқанлиқини мәлум қилған. Лагер шаһити зумрәт давут "маслашмиди" дегән җавабқа асасән сәйярәниң әһвали һәққидики пәрәзлирини оттуриға қойди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Ғайиб дохтур сәйярә ниҗат һәққидә учур елиш үчүн йеқинда у ишлигән "достлуқ дохтурханиси", йәни 3 ‏-дохтурханиға қайтидин телефон қилдуқ. Нөвәтчи хадимлар, сәйярә ниҗат һәққидә мәлумат елиш үчүн, дохтурханиниң мәмурийәт бөлүмигә телефон қилишимизни тәвсийә қилди. Бу күндики ениқлашлиримиз давамида хадимлардин бири бу дохтурхана мәсуллириниң, сәйярә ниҗат һәққидә учур елиш үчүн алдинқи йили бир қетим қамақханиға барғанлиқини ашкарилиди. Әмма қандақ бир җавабқа еришкәнлики һәққидә мәлумат берәлмиди. Биз бу һәқтә мәлумат елиш үчүн сәйярә ниҗат олтурушлуқ тәвәлик сақчиханисиға қайтидин телефон қилдуқ. Алақидар сақчи хадими 3 ‏-дохтурхана мәсуллириниң давән қамақханисиға берип сәйярә ниҗат һәққидә әһвал сүрүштә қилғанлиқини ашкарилиди. Мәлум болушичә қамақхана хадимлири дохтурхана мәсуллириға, униң һаят икәнликини билдүрүш билән бирликтә, сақчиларға маслашмиғанлиқи үчүн делосиниң хуласиси чиқмиғанлиқи вә аилиси билән техичә көрүштүрмигәнликини ейтқан. Әмма униң сақчиларниң қайси тәләплиригә маслашмиғанлиқи һәққидә учур берәлмиди.

Илгирики ениқлашлиримизда, сабиқ мәһбуслардин мәмәттурсун осман, тутқунларниң тоқулма җинайәтләрни үстигә алмиғичә тутуп турулушниң вә қийин-қистақниң давамлишидиғанлиқини тилға алғаниди. Турсунай зиявудунниң әң йеқинда ғула-ғула қозғиған, бир қетимлиқ ахбарат гуваһлиқида, тутқунларниң хитай сақчилириниң җинсий чеқилишлириғиму маслишиш вә бойсунушқа мәҗбурлинидиғанлиқи паш қилинған. Биз бүгүн лагер шаһити зумрәт давуттин, сәйярә ниҗат һәққидә дейилгән "маслашмиди" дегән учурниң, у дуч кәлгән қандақ еһтималлиқларни әкс әттүридиғанлиқи һәққидә мәлумат соридуқ.

Зумрәт давут хитай сақчилириниң тутқунларни маслашмиди дейиши үчүн тутқунларниң көңли тартмиған тамақни рәт қилиштин тартип сақчиларниң әхлақсиз тәләплирини рәт қилишиға қәдәр миңларчә сәвәб тепилидиғанлиқини тилға алди. Сәйярәниң бир дохтур болуш сүпити билән өзигә сунулған дориларни йейишни рәт қилғанлиқ еһтималлиқини вә яки униң бир зиялий болуш сүпити билән лагердики мәнтиқсиз тәлим-тәрбийәләргә қарита қайил болмиғанлиқини чандуруп қойғанлиқ еһтималлиқиниму тилға алди. Лагерларда түзүмгә амалсиз бойсунидиған итаәтчан тутқунлар көп болғинидәк, йәнә зораванлиққа қилчә баш әгмәйдиған, бешиға һәрқандақ бир бала келишидин қаршилиқ көрситиштин янмайдиған тутқунларниңму барлиқини әскәртти. Алақидар сақчи хадими сәйярә ниҗатниң миҗәзиниң бир кәскин икәнлики һәққидә шикайәт қилғаниди. Зумрәт давут сәйярә ниҗатниң лагерда җинсий чеқилишқа дуч кәлгәнлик еһтималлиқиниму чәткә қақмиди. Зумрәтниң дейишичә, бу хил әһвалдиму сақчилар тутқунларниң әһвалини аилиси яки җәмийәткә ашкарилап қоймаслиқи үчүн уларни аилисигә көрсәтмәслик еһтималлиқи мәвҗут икән.

Юқирида ғайиб дохтур сәйярә ниҗатниң қамақханида сақчиларға "маслашмиған" лиқи үчүн 4 йилдин буян аилисигә көрситилмигәнлики һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт