Seyyare nijatning saqchilargha "Maslashmighanliqi" üchün 4 yildin buyan délosining xulasisi chiqmighanliqi melum

Muxbirimiz shöhret hoshur
2021-02-11
Share
Seyyare nijatning saqchilargha Ürümchi dostluq doxturxanisining doxturi seyyare nijat xanim. (Waqti we orni éniq emes)
Nadire Nijat teminligen

Ürümchi dostluq doxturxanisining ghayib doxturi seyyare nijat heqqide ilgiri igiligen uchurlirimizda, uning dawendiki ayallar qamaqxanisida tutup turuluwatqanliqi ashkarilan'ghanidi. Muxbirimizning yéqinqi éniqlashlirida, dostluq doxturxanisi mes'ullirining seyyare nijatni sürüshte qilip 2018 ‏-yili bir qétim mezkur qamaqxanigha barghanliqi we qamaqxana xadilirining ulargha, seyyare nijatning saqchilargha maslashmighanliqi üchün dawamliq tutup turuluwatqanliqini melum qilghan. Lagér shahiti zumret dawut "Maslashmidi" dégen jawabqa asasen seyyarening ehwali heqqidiki perezlirini otturigha qoydi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Ghayib doxtur seyyare nijat heqqide uchur élish üchün yéqinda u ishligen "Dostluq doxturxanisi", yeni 3 ‏-doxturxanigha qaytidin téléfon qilduq. Nöwetchi xadimlar, seyyare nijat heqqide melumat élish üchün, doxturxanining memuriyet bölümige téléfon qilishimizni tewsiye qildi. Bu kündiki éniqlashlirimiz dawamida xadimlardin biri bu doxturxana mes'ullirining, seyyare nijat heqqide uchur élish üchün aldinqi yili bir qétim qamaqxanigha barghanliqini ashkarilidi. Emma qandaq bir jawabqa érishkenliki heqqide melumat bérelmidi. Biz bu heqte melumat élish üchün seyyare nijat olturushluq tewelik saqchixanisigha qaytidin téléfon qilduq. Alaqidar saqchi xadimi 3 ‏-doxturxana mes'ullirining dawen qamaqxanisigha bérip seyyare nijat heqqide ehwal sürüshte qilghanliqini ashkarilidi. Melum bolushiche qamaqxana xadimliri doxturxana mes'ullirigha, uning hayat ikenlikini bildürüsh bilen birlikte, saqchilargha maslashmighanliqi üchün délosining xulasisi chiqmighanliqi we a'ilisi bilen téxiche körüshtürmigenlikini éytqan. Emma uning saqchilarning qaysi teleplirige maslashmighanliqi heqqide uchur bérelmidi.

Ilgiriki éniqlashlirimizda, sabiq mehbuslardin memettursun osman, tutqunlarning toqulma jinayetlerni üstige almighiche tutup turulushning we qiyin-qistaqning dawamlishidighanliqini tilgha alghanidi. Tursun'ay ziyawudunning eng yéqinda ghula-ghula qozghighan, bir qétimliq axbarat guwahliqida, tutqunlarning xitay saqchilirining jinsiy chéqilishlirighimu maslishish we boysunushqa mejburlinidighanliqi pash qilin'ghan. Biz bügün lagér shahiti zumret dawuttin, seyyare nijat heqqide déyilgen "Maslashmidi" dégen uchurning, u duch kelgen qandaq éhtimalliqlarni eks ettüridighanliqi heqqide melumat soriduq.

Zumret dawut xitay saqchilirining tutqunlarni maslashmidi déyishi üchün tutqunlarning köngli tartmighan tamaqni ret qilishtin tartip saqchilarning exlaqsiz teleplirini ret qilishigha qeder minglarche seweb tépilidighanliqini tilgha aldi. Seyyarening bir doxtur bolush süpiti bilen özige sunulghan dorilarni yéyishni ret qilghanliq éhtimalliqini we yaki uning bir ziyaliy bolush süpiti bilen lagérdiki mentiqsiz telim-terbiyelerge qarita qayil bolmighanliqini chandurup qoyghanliq éhtimalliqinimu tilgha aldi. Lagérlarda tüzümge amalsiz boysunidighan ita'etchan tutqunlar köp bolghinidek, yene zorawanliqqa qilche bash egmeydighan, béshigha herqandaq bir bala kélishidin qarshiliq körsitishtin yanmaydighan tutqunlarningmu barliqini eskertti. Alaqidar saqchi xadimi seyyare nijatning mijezining bir keskin ikenliki heqqide shikayet qilghanidi. Zumret dawut seyyare nijatning lagérda jinsiy chéqilishqa duch kelgenlik éhtimalliqinimu chetke qaqmidi. Zumretning déyishiche, bu xil ehwaldimu saqchilar tutqunlarning ehwalini a'ilisi yaki jem'iyetke ashkarilap qoymasliqi üchün ularni a'ilisige körsetmeslik éhtimalliqi mewjut iken.

Yuqirida ghayib doxtur seyyare nijatning qamaqxanida saqchilargha "Maslashmighan" liqi üchün 4 yildin buyan a'ilisige körsitilmigenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet